దళపతి విజయ్ ఆఖరి చిత్రం 'జననాయగన్' విడుదలకు ముందే హెచ్.డి ప్రింట్ లీక్ అవ్వడం కోలీవుడ్లో ప్రకంపనలు సృష్టిస్తోంది. ఈ డిజిటల్ అటాక్ వెనుక విజయ్ రాజకీయ ఎదుగుదలను అడ్డుకునే కుట్ర ఉందా? ఎడిటింగ్ రూమ్ నుంచే సినిమా ఎలా బయటకు వచ్చింది? రజనీకాంత్ రియాక్షన్ మరియు పూర్తి వివరాల కోసం ఈ కథనం చదవండి.
చెన్నై , ఏప్రియల్ 11 : సినిమా రంగంలో గతంలో ఎన్నడూ చూడని రీతిలో ఒక అగ్ర హీరో నటించిన అత్యంత ప్రతిష్టాత్మక చిత్రం, అది కూడా ఆయన కెరీర్లోనే చివరి సినిమాగా భావిస్తున్న 'జననాయగన్' థియేటర్లలో అడుగుపెట్టకముందే పైరసీ వెబ్సైట్లలో ప్రత్యక్షం కావడం తమిళ చిత్ర పరిశ్రమను షాక్కు గురిచేసింది. కేవలం క్లిప్లు మాత్రమే కాకుండా, ఏకంగా హై డెఫినిషన్ప్రింట్ ఆన్లైన్లోకి రావడం వెనుక ఏదో బలమైన అంతర్గత కుట్ర దాగి ఉందనే అనుమానాలు ఇప్పుడు బలపడుతున్నాయి. తమిళనాడు రాజకీయాల్లో కీలక మార్పులకు శ్రీకారం చుట్టిన విజయ్రాజకీయ భవిష్యత్తును దెబ్బతీసేందుకే ఈ తరహా 'డిజిటల్ అటాక్' జరిగిందని సినీ విశ్లేషకులు భావిస్తున్నారు.
ఈ నెల 9 గురువారం రాత్రి పొద్దుపోయిన తర్వాత సోషల్ మీడియా వేదికగా 'జననాయగన్' లోని కీలకమైన టైటిల్ కార్డ్స్ , విజయ్ ఇంట్రడక్షన్ సీన్ క్లిప్స్ బయటకు వచ్చాయి. ఆరంభంలో ఇవి ఎవరో సెల్ఫోన్తో చిత్రీకరించిన ఫుటేజ్ అని భావించినప్పటికీ, తెల్లవారేసరికి పరిస్థితి పూర్తిగా మారిపోయింది. శుక్రవారం తెల్లవారుజామున సినిమాలోని ముఖ్యమైన సన్నివేశాలతో పాటు దాదాపు పూర్తి సినిమా హెచ్.డి క్వాలిటీతో పైరసీ వెబ్సైట్లలో అప్లోడ్ అయింది. సాధారణంగా సినిమా విడుదలయ్యాక కొన్ని గంటలకు పైరసీ రావడం చూస్తుంటాం, కానీ సెన్సార్ అడ్డంకుల వల్ల విడుదల వాయిదా పడిన ఈ చిత్రం ఈ స్థాయిలో లీక్ అవ్వడం చిత్ర నిర్మాత కెవిఎన్ ప్రొడక్షన్స్ను కోలుకోలేని దెబ్బ తీసింది. సినిమాలోని 'ఎడిట్ మార్క్స్' స్పష్టంగా కనిపిస్తుండటంతో, ఇది థియేటర్ నుంచి కాకుండా ఎడిటింగ్ టేబుల్ లేదా పోస్ట్ ప్రొడక్షన్ యూనిట్ నుంచే లీక్ అయిందని నిర్ధారణ అవుతోంది.
టీవీకే టార్గెట్గా కుట్ర?
విజయ్ తన రాజకీయ పార్టీ 'తమిళగ వెట్రి కళగం' – టి వి కె స్థాపించిన తర్వాత ఆయనపై రాజకీయ ఒత్తిళ్లు పెరిగాయనేది బహిరంగ రహస్యం. ప్రస్తుతం లీక్ అయిన వెర్షన్ వెనుక విజయ్ రాజకీయ వ్యతిరేకుల హస్తం ఉందనే ఆరోపణలు గట్టిగా వినిపిస్తున్నాయి. ముఖ్యంగా ఈ లీక్ టైమింగ్ గమనిస్తే, ఆయన ఎన్నికల ప్రచారంలో నిమగ్నమై ఉన్న తరుణంలో ఈ దెబ్బ కొట్టడం, విజయ్ మేనియాను తగ్గించడానికి, ఆయన సినిమా క్రేజ్ను నీరుగార్చడానికి కావాలనే కొందరు అంతర్గత వ్యక్తుల సాయంతో ఈ పని చేయించారని అభిమానులు మండిపడుతున్నారు. ఎన్నికల్లో విజయ్కు లభించే సానుభూతిని అడ్డుకోవడానికి, ఆయన ఇమేజ్ను డ్యామేజ్ చేయడానికి జరిగిన ఒక మాస్టర్ ప్లాన్ గా దీన్ని సినిమా వర్గాలు అభివర్ణిస్తున్నాయి.
వివాదాస్పద అంశాలు.. మళ్లీ అవే ఆరోపణలు
గతంలో 'తుపాకీ' సినిమా సమయంలో ఎదుర్కొన్న ముస్లిం వ్యతిరేక ముద్ర ఇప్పుడు 'జననాయగన్' కు శాపంగా మారుతోంది. ఈ సినిమాలో ముస్లింలను తప్పుగా చిత్రీకరించారనే వాదనలతో సెన్సార్ బోర్డు అడ్డంకులు సృష్టించిన విషయం తెలిసిందే. లీక్ అయిన ఫుటేజీలో అవే సన్నివేశాలు ఉండటంతో, కావాలనే ఒక వర్గాన్ని రెచ్చగొట్టి విజయ్కు రాజకీయంగా నష్టం చేకూర్చాలనే ప్రయత్నం జరుగుతోందని తెలుస్తోంది. ముస్లిం ఓటు బ్యాంకును ప్రభావితం చేసేలా ఈ లీక్డ్ కంటెంట్ను సోషల్ మీడియాలో వైరల్ చేయడం వెనుక రాజకీయ ప్రత్యర్థుల ప్రమేయం ఉందనే అనుమానాలు వ్యక్తమవుతున్నాయి. సెన్సార్ బోర్డు సూచించిన మార్పులు చేయకుండా కోర్టుకు వెళ్లడం కూడా ఈ జాప్యానికి, తద్వారా ఈ లీక్ కు దారితీసిందని కొందరు విమర్శిస్తున్నారు.
దిగ్భ్రాంతిలో సినీ పరిశ్రమ: గళమెత్తిన రజనీకాంత్
ఈ ఘటనపై చిత్ర పరిశ్రమ అంతా ఏకతాటిపైకి వచ్చి ఖండిస్తోంది. సూపర్ స్టార్ రజనీకాంత్ స్వయంగా స్పందిస్తూ, ఇంటర్నెట్లో సినిమాను విడుదల చేయడం ఘోరమైన నేరమని, ఇది చిత్ర పరిశ్రమపై జరిగే దాడి అని ఆవేదన వ్యక్తం చేశారు. బాధ్యులను కఠినంగా శిక్షించాలని ఆయన ప్రభుత్వాన్ని డిమాండ్ చేశారు. అటు నిర్మాత ధనుంజయన్ కూడా స్పందిస్తూ, కెవిఎన్ ప్రొడక్షన్స్ తక్షణమే చట్టపరమైన చర్యలు తీసుకోవాలని, లింకులను తొలగించేలా కోర్టు నుంచి ఆదేశాలు పొందాలని సూచించారు. సినిమా కోసం రాత్రింబవళ్లు కష్టపడిన వేలాది మంది కార్మికుల పొట్ట కొట్టేలా ఉన్న ఈ పైరసీపై సర్వత్రా నిరసన వ్యక్తమవుతోంది.
విజయ్ అభిమానులకు ఈ సినిమా కేవలం ఒక వినోదం మాత్రమే కాదు, ఆయన వెండితెరపై కనిపించే చివరి జ్ఞాపకం. "మన దళపతి రాజకీయాల్లోకి వెళ్లే ముందు మనకిచ్చే ఆఖరి కానుక ఇది, దాన్ని ఇలా పీడకలగా మార్చేశారు" అంటూ సోషల్ మీడియాలో అభిమానులు కన్నీటి పర్యంతమవుతున్నారు. పైరసీ లింకులను ఎవరూ చూడవద్దని, వాటిని రిపోర్ట్ చేయాలని ఫ్యాన్స్ గ్రూపులు పెద్ద ఎత్తున ప్రచారం చేస్తున్నాయి. హెచ్. వినోద్ దర్శకత్వంలో ఎంతో ప్రతిష్టాత్మకంగా రూపొందిన ఈ చిత్రానికి బాబీ డియోల్, పూజా హెగ్డే వంటి అగ్ర తారాగణం ఉండటం, భారీ బడ్జెట్ వెచ్చించడం వల్ల నిర్మాతలకు ఇప్పుడు కోట్లాది రూపాయల నష్టం వాటిల్లే ప్రమాదం ఉంది.
మొత్తానికి, 'జననాయగన్' లీక్ వ్యవహారం ఇప్పుడు కేవలం సినిమా సమస్యగా మిగిలిపోలేదు. ఇది తమిళనాడు రాజకీయాల్లో ఒక సెన్సేషన్ గా మారింది. ఈ డిజిటల్ కుట్రను ఛేదించి బాధ్యులను పట్టుకుంటారా లేదా అన్నది ఇప్పుడు మిలియన్ డాలర్ల ప్రశ్న.
