న్యూఢిల్లీ: దేశ రాజధానిలో వేళ్లూనుకున్న మాదకద్రవ్యాల సరఫరా ముఠాపై ఢిల్లీ పోలీసుల క్రైమ్ బ్రాంచ్ విభాగం ఉక్కుపాదం మోపింది. యాంటీ నార్కోటిక్స్ టాస్క్ ఫోర్స్ (ANTF) అత్యంత వ్యూహాత్మకంగా వ్యవహరించి, సుదీర్ఘ కాలంగా పరారీలో ఉన్న మోస్ట్ వాంటెడ్ డ్రగ్స్ సప్లయర్ విజయ్‌ను ఎట్టకేలకు అదుపులోకి తీసుకుంది. నిందితుడిని అరెస్ట్ చేసిన సమయంలో అతని వద్ద నుంచి 100 గ్రాముల నాణ్యమైన హీరోయిన్ (స్మాక్) స్వాధీనం చేసుకున్నారు. అంతర్జాతీయ మార్కెట్‌లో ఈ కేసులో ఇప్పటివరకు స్వాధీనం చేసుకున్న మొత్తం 612 గ్రాముల డ్రగ్స్ విలువ సుమారు 3 కోట్ల రూపాయల వరకు ఉంటుందని అధికారులు అంచనా వేస్తున్నారు.

వ్యూహాత్మక ఆపరేషన్.. ఇందర్‌పురిలో చిక్కిన నిందితుడు

నిందితుడు విజయ్ (31) అరెస్టు కోసం గతంలోనే 20,000 రూపాయల నగదు బహుమతిని ప్రకటించారు. ఏప్రిల్ 27, 2026న నిందితుడు మారుతి స్విఫ్ట్ కారులో నారాయణ ప్రాంతానికి వస్తున్నట్లు పోలీసులకు పక్కా సమాచారం అందింది. ఇన్‌స్పెక్టర్ వికాస్ పన్ను పర్యవేక్షణలో, ఏసీపీ కుల్దీప్ యాదవ్ మార్గదర్శకత్వంలో ఎస్‌ఐ అమరేంద్ర నేతృత్వంలోని ప్రత్యేక బృందం ఇందర్‌పురి సమీపంలో మాటు వేసి నిందితుడిని విజయవంతంగా పట్టుకుంది. నిందితుడు ప్రయాణిస్తున్న కారు అతని బంధువు పేరు మీద రిజిస్టర్ అయి ఉండగా, అందులోనే మత్తు పదార్థాలను దాచి తరలిస్తున్నట్లు తనిఖీల్లో వెల్లడైంది.

2025లో మొదలైన విచారణ.. బయటపడ్డ డ్రగ్స్ చైన్

ఈ డ్రగ్స్ నెట్‌వర్క్ వెనుక ఉన్న అసలు మూలాలు 2025 జనవరిలో జరిగిన ఒక అరెస్టుతో వెలుగులోకి వచ్చాయి. జనవరి 20, 2025న క్రైమ్ బ్రాంచ్ పోలీసులు పుష్ప, అవేష్ అలియాస్ బిట్టు అనే వ్యక్తులను 512 గ్రాముల స్మాక్‌తో పట్టుకున్నారు. వారిని విచారించగా, పుష్ప తన అల్లుడు అక్షయ్ ద్వారా ఈ మాదకద్రవ్యాలను పొందుతున్నట్లు తేలింది. ఈ గొలుసుకట్టు సరఫరాలో విజయ్, కుసుమ్ మరియు రాహుల్ అలియాస్ కాకు ప్రధాన సప్లయర్లుగా వ్యవహరిస్తున్నట్లు నిర్ధారణ కావడంతో, వారిపై ఎన్డీపీఎస్ (NDPS) చట్టం కింద కేసు నమోదు చేసి గాలింపు చేపట్టారు.

బరేలీ నుంచి ఢిల్లీ గల్లీల వరకు సరఫరా సాగిందిలా

విచారణలో వెల్లడైన వివరాల ప్రకారం, నిందితుడు విజయ్ ఉత్తరప్రదేశ్‌లోని బరేలీ నుంచి హీరోయిన్‌ను సేకరించి ఢిల్లీకి తరలించేవాడు. ఇక్కడికి వచ్చిన మత్తు పదార్థాలను తన అనుచరుడు అవతార్ సింగ్ అలియాస్ రిక్కీ ద్వారా లేదా నేరుగా అక్షయ్‌కు అందించేవాడు. అక్షయ్ ఆ డ్రగ్స్‌ను పుష్పకు చేరవేయగా, ఆమె వాటిని చిన్న చిన్న పొట్లాలుగా (పుడియాలు) మార్చేది. ఈ పొట్లాలు రైల్వే ట్రాక్ సమీపంలోని డ్రగ్స్ అడిక్ట్‌లకు విక్రయించే బాధ్యతను బిట్టు చూసుకునేవాడు. గతంలో రిక్కీ అరెస్ట్ అయినప్పటి నుంచి విజయ్ తన నివాసాలను మారుస్తూ పోలీసుల కళ్లు గప్పుతూ వస్తున్నాడు. తాజాగా విజయ్ అరెస్టుతో ఈ సరఫరా వ్యవస్థకు బలమైన దెబ్బ తగిలిందని, మిగిలిన నిందితుల కోసం గాలింపు కొనసాగుతోందని డీసీపీ రాహుల్ అల్వాల్ తెలిపారు.