ఉత్తరప్రదేశ్, ఏప్రియల్ 13: రోజు రోజుకి మనిషి దిగజారి పోతున్న ఘటనలు వరుసగా వెలుగు చూస్తున్నాయి. కడుపులో పెరుగుతున్నది తన బిడ్డ అని కూడా చూడకుండా ఒక కిరాతకుడు చేసిన పని సభ్య సమాజాన్ని విస్మయానికి గురిచేస్తోంది. అదనపు కట్నం కోసం ఓ గర్భిణిపై భర్త, అత్తమామలు సాగించిన అమానుష వేధింపులు చివరకు ఒక పసి ప్రాణం భూమిని చూడకముందే కనుమూసేలా చేశాయి. ఉత్తరప్రదేశ్‌లోని భదోహీ జిల్లాలో చోటుచేసుకున్న ఈ దారుణ ఘటన ఆలస్యంగా వెలుగులోకి వచ్చి, స్థానికంగా తీవ్ర కలకలం రేపుతోంది.

గుదరీపూర్ నివాసి అయిన ఆరాధన శుక్లాకు, భానుపూర్ సియర్హా గ్రామానికి చెందిన అభినేష్ శుక్లాతో 2022 మే 21న అత్యంత వైభవంగా వివాహం జరిగింది. పెళ్లి సమయంలో ఆరాధన కుటుంబ సభ్యులు తమ శక్తికి మించి భారీగానే కట్నకానుకలు సమర్పించారు. అయితే, ఆశకు హద్దుల్లేవన్నట్లుగా, పెళ్లయిన కొద్దిరోజులకే అదనపు కట్నం వేధింపులు మొదలయ్యాయి. ఆమె అత్త గీతాదేవి, బావ ప్రదీప్ శుక్లా ప్రోద్బలంతో భర్త అభినేష్ మరో 10 లక్షల రూపాయలు కావాలని వేధించడం ప్రారంభించాడు. పుట్టింటి నుంచి డబ్బు తీసుకురావాలని శారీరక, మానసిక హింసకు గురిచేసేవారని బాధితురాలు ఆవేదన వ్యక్తం చేసింది.

బాధితురాలు ఎనిమిది నెలల గర్భిణిగా ఉన్న సమయంలో కూడా ఆ కిరాతకుల మనసు కరగలేదు. అడిగిన డబ్బు తీసుకురాలేదన్న కోపంతో భర్త అభినేష్ శుక్లా అమానుషంగా ప్రవర్తించాడు. గర్భిణి అని కూడా చూడకుండా ఆమె కడుపుపై బలంగా తన్నాడు. ఒకసారి కాదు, రెండు సార్లు వరుసగా కడుపుపై తన్నడంతో ఆరాధన తీవ్ర రక్తస్రావానికి గురై కుప్పకూలిపోయింది. పరిస్థితి విషమించడాన్ని గమనించిన నిందితులు, ఆమెను ఆసుపత్రికి తీసుకెళ్లాల్సింది పోయి మొండిగా పుట్టింటికి పంపేశారు. తల్లిదండ్రులు వెంటనే ఆమెను ఆసుపత్రిలో చేర్పించినప్పటికీ, అప్పటికే జరగకూడని నష్టం జరిగిపోయింది. పరీక్షించిన వైద్యులు కడుపులోని ఎనిమిది నెలల శిశువు మరణించినట్లు నిర్ధారించారు.

న్యాయం కోసం బాధితురాలి పోరాటం

ఈ ఘోరంపై బాధితురాలు ఆరాధన శుక్లా వెనక్కి తగ్గలేదు. తన బిడ్డ మరణానికి కారణమైన వారిని శిక్షించాలని నిశ్చయించుకుంది. ప్రభుత్వం నిర్వహించే ‘జన సునవాయి’ (ప్రజా ఫిర్యాదుల విన్నపం) కార్యక్రమంలో స్వయంగా పాల్గొని పోలీసు అధికారులకు తన గోడు వెళ్లబోసుకుంది. గర్భస్థ శిశువు మరణం, కట్నం వేధింపులపై ఆధారాలతో సహా ఫిర్యాదు చేయడంతో ఉన్నతాధికారులు సీరియస్ అయ్యారు.

ఏడుగురిపై కేసు నమోదు - పోలీసుల దర్యాప్తు

బాధితురాలి ఫిర్యాదు మేరకు భదోహీ పోలీసులు లోతైన విచారణ చేపట్టారు. జిల్లా పోలీస్ సూపరింటెండెంట్ (ఎస్పీ) అభినవ్ త్యాగి తెలిపిన వివరాల ప్రకారం.. బాధితురాలి భర్త అభినేష్ శుక్లా, అత్త గీతాదేవి, బావ ప్రదీప్ శుక్లా సహా మొత్తం ఏడుగురిపై వివిధ సెక్షన్ల కింద కేసులు నమోదు చేశారు. భారతీయ న్యాయ సంహిత (BNS)సెక్షన్ 91 ప్రకారం శిశువు సజీవంగా పుట్టకుండా నిరోధించాలనే ఉద్దేశంతో లేదా పుట్టిన తర్వాత మరణించేలా చేయాలనే ఉద్దేశంతో చేసే చర్య. సెక్షన్ 85 - వివాహితను భర్త లేదా భర్త తరపు బంధువులు క్రూరత్వానికి గురిచేయడం., సెక్షన్ 351(3)- నేరపూరిత బెదిరింపులకు పాల్పడటం., సెక్షన్ 115(2): ఉద్దేశపూర్వకంగా గాయపరచడం తో పాటు వరకట్న నిషేధ చట్టం కింద కూడా వారిపై కేసులు నమోదు చేసినట్లు పోలీసులు తెలిపారు. నిందితుల కోసం గాలింపు చర్యలు ముమ్మరం చేశామని, చట్టం నుంచి ఎవరూ తప్పించుకోలేరని ఎస్పీ స్పష్టం చేశారు.

ఈ ఘటనపై మహిళా సంఘాలు తీవ్రస్థాయిలో మండిపడుతున్నాయి. కట్నం కోసం కన్నబిడ్డనే చంపుకునే స్థాయికి దిగజారడం సమాజానికి సిగ్గుచేటని పేర్కొంటున్నారు. ఇలాంటి మృగాలకు కఠిన శిక్ష పడితేనే భవిష్యత్తులో ఇటువంటి అకృత్యాలకు అడ్డుకట్ట వేయగలమని స్థానికులు డిమాండ్ చేస్తున్నారు. ఒకవైపు మహిళా సాధికారత గురించి మాట్లాడుతున్నా, మరోవైపు గ్రామాల్లో ఇంకా వేళ్లూనుకుపోయిన ఈ కట్న పిశాచి ఎన్ని ప్రాణాలను బలితీసుకుంటుందోనన్న ఆందోళన వ్యక్తమవుతోంది.

ప్రస్తుతం ఆరాధన ఆసుపత్రి నుంచి కోలుకుంటున్నప్పటికీ, తన బిడ్డను కోల్పోయిన పుట్టెడు దుఃఖంలో ఉంది. చట్టం తన ప్రాణానికి ప్రాణం తీసుకురాలేదని తెలిసినా, తనకు జరిగిన అన్యాయానికి కారకులైన వారు జైలు ఊచలు లెక్కపెట్టాలని ఆమె కోరుకుంటోంది. పోలీసుల ప్రాథమిక విచారణలో నిందితుల అమానుషత్వం స్పష్టంగా కనిపిస్తుండటంతో, కోర్టులో ఈ కేసును వేగంగా విచారించి బాధితురాలికి న్యాయం చేయాలని సర్వత్రా విజ్ఞప్తులు అందుతున్నాయి.