మానవత్వం మంటగలిసింది. ప్రాణాలు కాపాడాల్సిన వైద్య వృత్తికే కళంకం తెస్తూ, కొందరు వైద్యులు ‘అవయవ దొంగలుగా’ మారారు. నిరుపేదల అవసరాలను ఆసరాగా చేసుకుని లక్షలాది రూపాయలకు కిడ్నీలను బేరం పెడుతున్న భారీ అంతర్జాతీయ రాకెట్‌ను కాన్పూర్ పోలీసులు రట్టు చేశారు. కేవలం ఎనిమిదో తరగతి చదివిన ఒక డ్రైవర్ ఈ ముఠాకు సూత్రధారి కావడం, అత్యున్నత చదువులు చదివిన వైద్య దంపతులు అతడికి సహకరించడం సభ్యసమాజాన్ని విస్మయానికి గురిచేస్తోంది.

ఆ 50 వేల వివాదం.. రాకెట్‌ను బయటపెట్టింది!

ఈ దారుణ ఉదంతం వెలుగులోకి రావడానికి ఒక చిన్న వివాదం కారణమైంది. బీహార్‌కు చెందిన 23 ఏళ్ల ఎంబీఏ విద్యార్థి ఆయుష్ చౌదరి ఆర్థిక ఇబ్బందుల్లో ఉన్నాడు. దీన్ని గమనించిన ముఠా సభ్యులు 10 లక్షల రూపాయలు ఇస్తామని ఆశ చూపి అతడి కిడ్నీ తీసుకున్నారు. అయితే, సర్జరీ పూర్తయ్యాక అతడికి కేవలం 9.50 లక్షల రూపాయలే ఇచ్చి, మిగిలిన 50 వేలు ఎగ్గొట్టారు. దీంతో ఆగ్రహానికి గురైన ఆయుష్, కాన్పూర్ పోలీసులకు ఫోన్ చేయడంతో ఈ మాయాజాలం మొత్తం బయటపడింది.

8వ తరగతి ‘మాస్టర్ మైండ్’.. కోట్లలో లావాదేవీలు

ఈ కిడ్నీ రాకెట్‌కు ప్రధాన సూత్రధారి శివం అగర్వాల్. ఇతను కేవలం ఎనిమిదో తరగతి మాత్రమే చదువుకున్నాడు. ఒకప్పుడు హాస్పిటల్ లో డ్రైవర్‌గా పనిచేసిన శివం, టెలిగ్రామ్ గ్రూపుల ద్వారా కిడ్నీ డోనర్లను, రిసీవర్లను కలిపేవాడు. పేద డోనర్లకు రూ. 5 లక్షల నుండి రూ. 10 లక్షల వరకు ఆశ చూపేవాడు . అదే కిడ్నీని సంపన్న రోగులకు రూ. 60 లక్షల నుండి రూ. ఒక కోటి వరకు విక్రయించేవాడు. ఢిల్లీ, ముంబై, కోల్‌కతా మాత్రమే కాకుండా నేపాల్, దక్షిణాఫ్రికా వంటి దేశాలకు కూడా ఈ ముఠా కు సంబంధాలు ఉన్నట్లు పోలీసులు గుర్తించారు.

ఆపరేషన్ థియేటర్లలో ‘చీకటి’ సర్జరీలు

ఈ వ్యవహారంలో కాన్పూర్‌లోని అహూజా హాస్పిటల్, మెడ్ లైఫ్, ప్రియా హాస్పిటల్ యాజమాన్యాల పాత్ర కీలకంగా ఉంది. ఐఎంఏ కాన్పూర్ ఉపాధ్యక్షురాలు డాక్టర్ ప్రీతి అహూజా, ఆమె భర్త డాక్టర్ సుర్జీత్ అహూజాలతో పాటు మరో నలుగురిని పోలీసులు ఇప్పటికే అరెస్ట్ చేశారు. పోలీసుల విచారణలో విస్తుపోయే విషయాలు తెలిశాయి. ఆయుష్ నుంచి సేకరించిన కిడ్నీని మీరట్‌కు చెందిన పారుల్ తోమర్ అనే మహిళకు అమర్చారు. పోలీసులకు చిక్కకుండా ఉండేందుకు, కిడ్నీ తీసుకున్న వారిని ఒక ఆసుపత్రిలో, ఇచ్చిన వారిని మరో ఆసుపత్రిలో ‘గాల్ బ్లాడర్’ రోగులుగా రికార్డుల్లో నమోదు చేశారు.

బాధితురాలి పరిస్థితి విషమం.. పరారీలో మరికొందరు డాక్టర్లు

ప్రస్తుతం కిడ్నీ పొందిన పారుల్ తోమర్ (43) పరిస్థితి విషమంగా ఉంది. వైద్య పరిభాషలో దీనిని 'కిడ్నీ రిజెక్షన్' (శరీరం కొత్త అవయవాన్ని అంగీకరించకపోవడం) గా పేర్కొంటున్నారు. కిడ్నీ రిజెక్షన్ కారణంగా ఆమె ప్రాణాలు ప్రమాదంలో పడ్డాయి. కాన్పూర్‌లోని హాలెట్ ఆసుపత్రిలో ప్రస్తుతం ఆమెకు చికిత్స అందుతోంది. అయితే అక్కడ తగిన వసతులు లేకపోవడంతో, తక్షణమే లక్నోలోని ఉన్నత స్థాయి వైద్య సంస్థ ఎస్‌జీపీజీఐ (SGPGI) కి మెరుగైన చికిత్స కోసం ఆమెను తరలించాలని వైద్యులు సిఫార్సు చేశారు. మరోవైపు, ఈ కేసులో ప్రమేయం ఉన్న మరికొందరు వైద్యులు డాక్టర్ అఫ్జల్, డాక్టర్ రోహిత్, డాక్టర్ వైభవ్, డాక్టర్ అనురాగ్‌లు పరారీలో ఉన్నారు. వీరిపై ఇప్పటికే పోలీసులు లుకౌట్ నోటీసులు జారీ చేశారు.

విచారణలో తేలిన నగ్నసత్యాలు:

గత రెండేళ్లలో దాదాపు 10 నర్సింగ్ హోమ్‌ల ద్వారా ఈ ముఠా 50కి పైగా కిడ్నీ మార్పిడి శస్త్రచికిత్సలు నిర్వహించినట్లు పోలీసులు గుర్తించారు. టెలిగ్రామ్ ఛానళ్ల ద్వారా ‘అలీ’ అనే వ్యక్తి ఈ నెట్‌వర్క్‌ను నడిపిస్తున్నట్లు, వీరికి సైబర్ నేరగాళ్లతో కూడా సంబంధాలు ఉన్నట్లు తేలింది.

ఈ నిందితులపై ‘మానవ అవయవ మార్పిడి చట్టం’ మరియు బీఎన్ఎస్ (BNS) సెక్షన్ 143 (అక్రమ రవాణా) కింద కేసులు నమోదు చేశారు. నేరం నిరూపితమైతే 10 ఏళ్ల జైలు శిక్షతో పాటు ఒక కోటి రూపాయల జరిమానా పడే అవకాశం ఉంది.

ఈ ఘటన వైద్య రంగంలోనిబ్లాక్ షీప్ బయటపెట్టింది. అవసరం ఉన్న రోగుల బలహీనతను, పేదరికాన్ని వ్యాపారంగా మార్చుకున్న ఈ ‘వైట్ కాలర్’ నేరగాళ్లపై కఠిన చర్యలు తీసుకోవాలని ప్రజలు కోరుతున్నారు. కాన్పూర్ పోలీస్ కమిషనర్ రఘువీర్ లాల్ నేతృత్వంలో ఈ రాకెట్ వెనుక ఉన్న మరిన్ని చీకటి కోణాలను వెలికితీసేందుకు ప్రత్యేక బృందాలు గాలిస్తున్నాయి.

 కాన్పూర్ కిడ్నీ రాకెట్ తరహాలోనే గతంలో భారతదేశాన్ని వణికించిన మరికొన్ని సంచలన ఘటనలు ఉన్నాయి. వైద్య వృత్తిని వ్యాపారంగా మార్చిన ముఠాలు దేశవ్యాప్తంగా ఇప్పటికే పలుమార్లు వెలుగులోకి వచ్చాయి.

1. డాక్టర్ అమిత్ కుమార్ 'కిడ్నీ రాకెట్' (గురుగ్రామ్, 2008)

ఇది భారతదేశ చరిత్రలోనే అత్యంత పెద్ద కిడ్నీ స్కామ్‌గా పరిగణించబడుతుంది. దీనిని "కిడ్నీ దందా' అని కూడా పిలుస్తారు. హర్యానాలోని గుర్గావ్‌లో డాక్టర్ అమిత్ కుమార్ అనే వ్యక్తి వందలాది అక్రమ కిడ్నీ మార్పిడిలు చేశాడు. పేద కూలీలను పని ఇప్పిస్తామని నమ్మించి, వారిని బంధించి, మత్తు ఇచ్చి బలవంతంగా కిడ్నీలు తొలగించేవారు. ఒక్కో కిడ్నీని విదేశీయులకు (కెనడా, యూఎస్, యూఏఈ) భారీ ధరలకు విక్రయించేవారు. ఇంటర్పోల్ సహాయంతో ఇతడిని నేపాల్‌లో అరెస్ట్ చేశారు. ఈ ఘటన ఆధారంగానే బాలీవుడ్‌లో ‘అంకుర్ అరోరా మర్డర్ కేస్’ ,‘షరాఫత్ గయీ తేల్ లేనే’ వంటి సినిమాల్లో కొన్ని అంశాలను తీసుకున్నారు. ఇతనిని అప్పట్లో మీడియా "డాక్టర్ డెత్" అని పిలిచేది.

2. అపోలో హాస్పిటల్ కిడ్నీ స్కామ్ (ఢిల్లీ, 2016)

దేశ రాజధానిలోని అత్యంత ప్రతిష్టాత్మకమైన ఆసుపత్రిలో ఒకటైన అపోలోలో ఈ రాకెట్ వెలుగుచూడటం అప్పట్లో సంచలనం సృష్టించింది. దాతలకు, రోగులకు మధ్య బంధుత్వం ఉన్నట్లు తప్పుడు పత్రాలు (ఆధార్ కార్డులు, వివాహ ధ్రువీకరణ పత్రాలు) సృష్టించి అధికారులను బురిడీ కొట్టించేవారు. హాస్పిటల్ సిబ్బందితో పాటు మధ్యవర్తులు ఇందులో కీలకంగా వ్యవహరించారు. దాదాపు రూ. 5 లక్షలకు కిడ్నీ కొని, రూ. 30 లక్షల వరకు విక్రయించేవారు.

3. ముంబై హీరానందని హాస్పిటల్ స్కామ్ (2016)

ఢిల్లీ ఘటన జరిగిన కొద్ది రోజులకే ముంబైలో కూడా ఇలాంటిదే మరో రాకెట్ బయటపడింది. ఒక మహిళ తన భర్తకు కిడ్నీ ఇస్తున్నట్లు నకిలీ పత్రాలు సృష్టించి ఆపరేషన్ చేస్తుండగా పోలీసులు అడ్డుకున్నారు. ఈ కేసులో హాస్పిటల్ సీఈఓ తో సహా ఐదుగురు ప్రముఖ వైద్యులను అరెస్ట్ చేయడం దేశవ్యాప్తంగా చర్చనీయాంశమైంది.

4. జలంధర్ కిడ్నీ స్కామ్ (పంజాబ్, 2002)

పంజాబ్‌లో వెలుగుచూసిన ఈ స్కామ్‌లో దాదాపు 600 కి పైగా అక్రమ మార్పిడిలు జరిగినట్లు తేలింది. అప్పుల ఊబిలో కూరుకుపోయిన పేద రైతులు, కూలీలను లక్ష్యంగా చేసుకుని వారి కిడ్నీలను తక్కువ ధరకే కొనుగోలు చేశారు.

ఇలాంటి అన్ని కేసుల్లోనూ కాన్పూర్ ఘటనలోని 'శివం అగర్వాల్' లాంటి మధ్యవర్తులే కీలక పాత్ర పోషించారు. చట్టం నుండి తప్పించుకోవడానికి దాతలను బంధువులుగా చిత్రీకరించడం సర్వసాధారణంగా కనిపిస్తుంది. పాత రోజుల్లో నేరుగా పరిచయాల ద్వారా జరిగే ఈ దందా, ఇప్పుడు కాన్పూర్ కేసులో చూసినట్లుగా టెలిగ్రామ్, వాట్సాప్ వంటి సోషల్ మీడియా వేదికల ద్వారా అంతర్జాతీయ స్థాయికి చేరుకుంది.

ఈ తరహా వరుస ఘటనల వల్లనే భారత ప్రభుత్వం 'Transplantation of Human Organs Act (THOA)'ని మరింత కఠినతరం చేసింది. అయినప్పటికీ, కాన్పూర్ ఉదంతం చూస్తుంటే 'బ్లాక్ షీప్' వైద్యులు మరియు మధ్యవర్తులు చట్టంలోని లొసుగులను వాడుకుంటూనే ఉన్నారని స్పష్టమవుతోంది.

తెలుగు రాష్ట్రాలైన ఆంధ్రప్రదేశ్, తెలంగాణలలో కూడా గతంలో పలుమార్లు భారీ కిడ్నీ రాకెట్లు వెలుగుచూసి సంచలనం సృష్టించాయి. ఇక్కడ కూడా పేదరికాన్ని ఆసరాగా చేసుకుని, దళారులు నెట్‌వర్క్ నడుపుతున్నట్లు అనేక విచారణల్లో తేలింది.

శ్రీకాకుళం - విశాఖపట్నం 'కిడ్నీ దందా' (2023-24) ఇటీవల కాలంలో అత్యంత సంచలనం సృష్టించిన కేసు ఇది. శ్రీకాకుళం జిల్లాలోని ఉద్దానం మరియు పల్లాన వంటి వెనుకబడిన ప్రాంతాల కూలీలను లక్ష్యంగా చేసుకున్నారు. అప్పుల బాధలో ఉన్నవారికి రూ. 5 లక్షల నుండి 8 లక్షలు ఇస్తామని ఆశ చూపి విశాఖపట్నంలోని కొన్ని కార్పొరేట్ ఆసుపత్రులలో ఆపరేషన్లు చేయించారు. దాతలను రోగుల బంధువులుగా చూపిస్తూ తప్పుడు ఆధార్ కార్డులు, రేషన్ కార్డులు సృష్టించారు. ఈ కేసులో పలువురు మధ్యవర్తులతో పాటు హాస్పిటల్ సిబ్బందిని కూడా పోలీసులు అరెస్ట్ చేశారు.

ఇక 2016-17 లలో హైదరాబాద్‌లోని కొన్ని ప్రముఖ ఆసుపత్రుల చుట్టూ ఈ వివాదం తిరిగింది. టర్కీ, ఈజిప్ట్ వంటి దేశాల నుంచి రోగులను తీసుకువచ్చి, ఇక్కడి స్థానిక పేద దాతల నుంచి కిడ్నీలు సేకరించి మార్పిడి చేసినట్లు ఆరోపణలు వచ్చాయి. ఇతర రాష్ట్రాల నుంచి దాతలను తీసుకువచ్చి, వారు తెలంగాణ వాసులేనని నకిలీ ధ్రువీకరణ పత్రాలు సృష్టించారనే ప్రచారం జరిగింది. అదేవిధంగాగతంలో నల్గొండ జిల్లాలోని కొన్ని గిరిజన తండాల్లోని ప్రజలు తీవ్ర పేదరికం వల్ల తమ కిడ్నీలను అమ్ముకున్న ఉదంతాలు వెలుగుచూశాయి. గుంటూరులోని కొన్ని ప్రైవేట్ ఆసుపత్రులు వేదికగా ఈ అక్రమ మార్పిడిలు జరిగాయి.

ఈ అక్రమాలను అరికట్టడానికి తెలుగు రాష్ట్ర ప్రభుత్వాలు 'జీవన్ దాన్' వంటి వ్యవస్థలను ప్రభుత్వాలు బలోపేతం చేశాయి. ఏ ఆసుపత్రిలోనైనా కిడ్నీ మార్పిడి జరగాలంటే ప్రభుత్వ అథరైజేషన్ కమిటీ అనుమతి తప్పనిసరి. దాత, స్వీకర్త మధ్య ఉన్న సంబంధాన్ని వీడియో రికార్డింగ్ ద్వారా ధ్రువీకరిస్తారు. అనుమానం వస్తే దాత, స్వీకర్తకు DNA పరీక్షలు నిర్వహించి బంధుత్వాన్ని నిర్ధారిస్తున్నారు. అవయవ దానం చేసే వ్యక్తి నేపథ్యాన్ని పోలీసులు లోతుగా విచారిస్తున్నారు.