Midnight Encounter in Delhi: 6 Notorious Bangladeshi Dacoits Arrested After Gunfight

న్యూడిల్లి , ఏప్రియల్ 15 : అత్యంత సాహసోపేతమైన ఆపరేషన్‌లో దిల్లీ క్రైమ్ బ్రాంచ్ పోలీసులు అంతర్జాతీయ గ్యాంగ్‌ను మట్టికరిపించారు. దేశవ్యాప్తంగా వందలాది కుటుంబాలను భయభ్రాంతులకు గురిచేస్తూ, వరుస దోపిడీలు, హత్యలతో అరాచకం సృష్టించిన ఆరుగురు బంగ్లాదేశీ కరడుగట్టిన డకాయిట్‌లను ఎట్టకేలకు కటకటాల్లోకి నెట్టారు. ఏప్రిల్ 14, 2026 అర్ధరాత్రి వేళ దిల్లీలోని సరాయ్ కాలే ఖాన్ శ్మశాన వాటిక సమీపంలో ఉన్న అడవి ప్రాంతంలో జరిగిన భీకర ఎదురుకాల్పుల అనంతరం ఈ ముఠాను పోలీసులు అదుపులోకి తీసుకున్నారు.

విశ్వసనీయ సమాచారం ప్రకారం, కరడుగట్టిన బంగ్లాదేశీ ముఠా ఒకటి దిల్లీలో మరో భారీ దోపిడీకి స్కెచ్ వేసిందని క్రైమ్ బ్రాంచ్ అధికారులకు పిన్‌పాయింట్ సమాచారం అందింది. దీనిపై తక్షణమే స్పందించిన డిసిపి సంజీవ్ కుమార్ యాదవ్ పర్యవేక్షణలో ఏసీపీ పంకజ్ అరోరా నేతృత్వంలోని ప్రత్యేక బృందం ఆపరేషన్‌ను ప్రారంభించింది. సరాయ్ కాలే ఖాన్ ప్రాంతంలోని నిర్మానుష్య అడవిలో ముఠా సభ్యులు పొంచి ఉన్నారన్న సమాచారంతో పోలీసులు అక్కడ మాటువేశారు. పోలీసులను చూసిన వెంటనే నేరస్థులు లొంగిపోవడానికి నిరాకరించి, నేరుగా అధికారులపైకి కాల్పులు ప్రారంభించారు. ఆత్మరక్షణ కోసం పోలీసులు కూడా ఎదురుదాడికి దిగడంతో ఆ ప్రాంతమంతా తుపాకుల గర్జనతో దద్దరిల్లింది. ప్రాణాలకు తెగించి పోరాడిన క్రైమ్ బ్రాంచ్ అధికారులు, ఎట్టకేలకు ఆరుగురు డకాయిట్‌లను చుట్టుముట్టి లొంగదీసుకున్నారు. అయితే, రాత్రి సమయంలో జరిగిన ఈ ఘటనలో మరో ఇద్దరు సభ్యులు పరారయ్యారు.

'హిట్-రన్-హైడ్': సరిహద్దులు దాటే వ్యూహం

ఈ గ్యాంగ్ అనుసరించే నేర శైలి పోలీసులను సైతం విస్మయానికి గురిచేస్తోంది. వీరు భారత్-బంగ్లాదేశ్ సరిహద్దుల నుండి దొంగచాటుగా దేశంలోకి ప్రవేశించి, ఏజెంట్ల సహకారంతో స్థావరాన్ని ఏర్పాటు చేసుకుంటారు. వీరి ప్రధాన లక్ష్యం సంపన్న వృద్ధులు ఒంటరిగా ఉండే ఇళ్లు. "హిట్-రన్-హైడ్" (దాడి చేయడం-పారిపోవడం-దాక్కోవడం) అనే వ్యూహంతో వీరు విరుచుకుపడతారు. దోపిడీ సమయంలో ఏమాత్రం ప్రతిఘటన ఎదురైనా అతి కిరాతకంగా బాధితులను చిత్రహింసలకు గురిచేయడం, గొంతులో గుడ్డలు కుక్కి ఊపిరాడకుండా చేసి హత్య చేయడం వీరి ప్రత్యేకత. నేరం చేసిన వెంటనే నగదు, బంగారంతో సరిహద్దులు దాటి బంగ్లాదేశ్‌కు పారిపోవడం వల్ల ఇన్నాళ్లూ వీరు పోలీసులకు దొరకకుండా తప్పించుకుంటున్నారు. కొన్ని నెలల విరామం తర్వాత మళ్ళీ కొత్త రాష్ట్రంలో కొత్త వేషంలో ప్రత్యక్షమవుతూ అరాచకాన్ని కొనసాగించేవారు.

అంతర్రాష్ట్ర నేరాల చిట్టా

ఈ ముఠా పట్టుబడటంతో దేశవ్యాప్తంగా పెండింగ్‌లో ఉన్న అనేక కీలక కేసులు కొలిక్కి వచ్చాయి. దిల్లీతో పాటు గోవా, కర్ణాటక, కేరళ, ఉత్తరప్రదేశ్, ఒడిశా వంటి రాష్ట్రాల్లో వీరు ఈ తరహా దారుణాలకు ఒడిగట్టారు.వీరు ఇప్పటి వరకు 14 నేరాలకు పాల్పడ్డారు.

• గోవా బీభత్సం: 2025లో గోవాలోని మాపుసా, పంజీ ప్రాంతాల్లో రెండు భారీ దోపిడీలకు పాల్పడి లక్షలాది రూపాయల విలువైన నగలు, సుమారు ఒక కేజీ బంగారాన్ని దోచుకెళ్లారు.

• కర్ణాటకలో హత్యలు: హుబ్లి , బెంగళూరులలో జరిగిన దోపిడీ కేసుల్లో బాధితులపై ఇనుప రాడ్లతో దాడి చేసి, నోట్లో గుడ్డలు కుక్కి వృద్ధులను చంపినట్లు వీరిపై ఆరోపణలు ఉన్నాయి.

• లక్నో ఎన్‌కౌంటర్: 2021లో ఉత్తరప్రదేశ్‌లోని లక్నోలో పోలీసులతో జరిగిన ఎన్‌కౌంటర్ నుండి తప్పించుకున్న నాసిర్ అనే నిందితుడు కూడా ఇప్పుడు పట్టుబడిన వారిలో ఉన్నాడు.

నిందితుల నేపథ్యం - పక్కా స్కెచ్

అరెస్టయిన వారిని సుమన్ హల్దార్, సైఫుల్ ఇస్లాం, సోహైల్ షేక్, ఎండీ నాసిర్, నూర్ ఇస్లాం మరియు జాకిర్ అని గుర్తించారు. వీరంతా బంగ్లాదేశ్‌లోని బాఘేర్‌హట్ జిల్లాకు చెందిన నిరక్షరాస్యులే అయినప్పటికీ, నేర ప్రణాళికలో మాత్రం ఆరితేరిన వారు. నిఘా వర్గాలకు దొరకకుండా ఉండటానికి వీరు మొబైల్ ఫోన్లను వాడరంటే వీరి జాగ్రత్త ఏ స్థాయిలో ఉందో అర్థం చేసుకోవచ్చు. స్థానిక బంధుత్వాలను, ఏజెంట్లను వాడుకుని ఏ ఇంట్లో ఎక్కువ నగదు, బంగారం ఉంటుందో ముందే సమాచారాన్ని సేకరించి, ఆయుధాలతో దాడి చేసేవారు. పోలీసుల నుంచి స్వాధీనం చేసుకున్న ఆయుధాలు, ఇళ్లు పగలగొట్టే పరికరాలు వీరి నేర స్వభావాన్ని చాటిచెబుతున్నాయి.

చివరికి, గోవా క్రైమ్ బ్రాంచ్ అందించిన కీలక ఇన్‌పుట్స్ , దిల్లీ పోలీసుల సమన్వయంతో ఈ అంతర్జాతీయ ముఠా ఆట కట్టించబడింది. ఈ ఆపరేషన్ తో దేశంలోని అనేక రాష్ట్రాల పోలీసులకు పెను సవాలుగా మారిన ఒక చీకటి సామ్రాజ్యం కుప్పకూలింది. ప్రస్తుతం వీరిపై దిల్లీ క్రైమ్ బ్రాంచ్ పోలీస్ స్టేషన్‌లో ఎఫ్.ఐ.ఆర్ నెం. 86/26 కింద కేసు నమోదైంది. పరారైన మిగిలిన సభ్యుల కోసం గాలింపు చర్యలు ముమ్మరం చేశారు.