విజయవాడ , ఏప్రియల్ 28: దేశవ్యాప్తంగా భానుడు భగభగలాడుతున్నాడు. రోజురోజుకూ పెరుగుతున్న ఉష్ణోగ్రతలు సామాన్యుల ప్రాణాలతో చెలగాటం ఆడుతున్నాయి. ఈ నేపథ్యంలో జాతీయ మానవ హక్కుల కమిషన్ (NHRC) తీవ్రస్థాయిలో స్పందించింది. ఎండల తీవ్రత వల్ల ప్రాణనష్టం జరగకుండా ముందస్తు జాగ్రత్తలు తీసుకోవాలని, ముఖ్యంగా సమాజంలోని అణగారిన వర్గాలను కాపాడాలని 21 రాష్ట్రాలు సహా దేశ రాజధాని ఢిల్లీ ప్రభుత్వానికి కీలక ఆదేశాలు జారీ చేసింది. ఏప్రిల్ 28న విడుదల చేసిన ఈ ప్రకటనలో, వేసవి తాపానికి బలవుతున్న నిరుపేదలు, నిరాశ్రయుల హక్కుల పరిరక్షణపై కమిషన్ గట్టిగా నిలబడింది.

ఎండల తీవ్రత: అల్పాదాయ వర్గాలు, నిరుపేదల ప్రాణాలకు పొంచి ఉన్న ముప్పు

వేడి గాలుల ప్రభావం అందరిపై ఒకేలా ఉండదని, సమాజంలోని బలహీన వర్గాలు దీనివల్ల తీవ్రంగా నష్టపోతున్నాయని మానవ హక్కుల కమిషన్ ఆందోళన వ్యక్తం చేసింది. సరైన ఆశ్రయం లేని నిరాశ్రయులు, ఎండలో శ్రమించే దినసరి కూలీలు, ఆర్థికంగా వెనుకబడిన వర్గాల పరిస్థితి అత్యంత దారుణంగా ఉందని కమిషన్ గుర్తించింది. పెరుగుతున్న ఉష్ణోగ్రతల వల్ల కేవలం ప్రాణ నష్టమే కాకుండా, ఉపాధి కోల్పోవడం, అగ్ని ప్రమాదాలు పెరగడం వంటి ముప్పులు కూడా పొంచి ఉన్నాయని హెచ్చరించింది. ఈ విపత్కర పరిస్థితుల్లో చిన్నపిల్లలు, అప్పుడే పుట్టిన శిశువులు, వృద్ధులు మరియు గర్భిణీ స్త్రీల ఆరోగ్యంపై ప్రత్యేక దృష్టి సారించాల్సిన అవసరం ఉందని ప్రభుత్వాలకు స్పష్టం చేసింది.

గత ఐదేళ్లలో 3,712 మరణాలు: ఎన్‌సీఆర్‌బీ గణాంకాలపై ఎన్ హెచ్ ఆర్ సి ఆందోళన

ఎండల తీవ్రత ఎంతటి ప్రాణాపాయానికి దారితీస్తుందో వివరించడానికి కమిషన్ జాతీయ నేర గణాంకాల బ్యూరో (NCRB) డాటాను ఉటంకించింది. 2019 నుండి 2023 మధ్య కాలంలో దేశవ్యాప్తంగా వడదెబ్బ కారణంగా దాదాపు 3,712 మంది ప్రాణాలు కోల్పోవడం పట్ల కమిషన్ విచారం వ్యక్తం చేసింది. ఈ మరణాలను కేవలం ప్రకృతి వైపరీత్యాలుగా చూడలేమని, సరైన వనరులు, ముందస్తు ప్రణాళికలు లేకపోవడం కూడా ఒక కారణమని అభిప్రాయపడింది. అందుకే భవిష్యత్తులో ఇటువంటి మరణాలను నివారించేందుకు సమగ్రమైన మరియు సమ్మిళితమైన కార్యాచరణను రూపొందించాలని ఆయా రాష్ట్రాల ప్రభుత్వ ప్రధాన కార్యదర్శులకు రాసిన లేఖలో కమిషన్ నొక్కి చెప్పింది.

ఎన్డీఎంఏ మార్గదర్శకాల అమలు తప్పనిసరి: ప్రభుత్వాలకు అల్టిమేటం

తెలుగు రాష్ట్రాలైన ఆంధ్రప్రదేశ్, తెలంగాణ సహా బీహార్, గుజరాత్, ఉత్తరప్రదేశ్, తమిళనాడు వంటి మొత్తం 21 రాష్ట్రాలు మరియు ఢిల్లీ ప్రభుత్వం తక్షణమే రంగంలోకి దిగాలని ఎన్ హెచ్ ఆర్ సి ఆదేశించింది. జాతీయ విపత్తు నిర్వహణ సంస్థ (NDMA) ఇప్పటికే జారీ చేసిన మార్గదర్శకాలను ప్రాతిపదికగా తీసుకుని, క్షేత్రస్థాయిలో ఉపశమన చర్యలు చేపట్టాలని సూచించింది. ప్రతి జిల్లా స్థాయి నుండి క్రోడీకరించిన సమాచారంతో 'యాక్షన్ టేకెన్ రిపోర్ట్' (ATR) సమర్పించాలని కమిషన్ కోరింది. రాష్ట్రాలు తమ వద్ద ఉన్న స్టాండర్డ్ ఆపరేటింగ్ ప్రొసీజర్స్ (SOPs) ప్రకారం మౌలిక సదుపాయాలు కల్పించాలని, ఎండల తీవ్రతపై ప్రజలను నిరంతరం అప్రమత్తం చేయాలని ఆదేశించింది.

ముఖ్యంగా బహిరంగ ప్రదేశాలలో తాగునీటి సదుపాయం, చలువ కేంద్రాల ఏర్పాటు, వడదెబ్బ తగిలిన వారికి తక్షణ వైద్య సహాయం అందించేలా ఆసుపత్రులను సిద్ధం చేయడం వంటి అంశాలలో నిర్లక్ష్యం వహించకూడదని కమిషన్ స్పష్టం చేసింది. ప్రభుత్వాలు తీసుకునే ముందస్తు చర్యలే వేల సంఖ్యలో ప్రాణాలను కాపాడుతాయని, ఈ దిశగా యుద్ధ ప్రాతిపదికన చర్యలు చేపట్టాలని ఎన్ హెచ్ ఆర్ సి తన ఆదేశాల్లో పేర్కొంది.