ఢిల్లీలో భారీ అంతర్జాతీయ సైబర్ మోసం వెలుగులోకి వచ్చింది. చైనా హ్యాండ్లర్లతో టెలిగ్రామ్ ద్వారా సంబంధాలు నడుపుతూ, సామాన్యుల సొమ్ము కొల్లగొడుతున్న ముఠాను పోలీసులు అరెస్ట్ చేశారు. ఈ స్కామ్లో బ్యాంక్ ఉద్యోగి పాత్రపై పూర్తి వివరాలు ఇక్కడ చూడండి.
న్యూఢిల్లీ, ఏప్రియల్ 16 : నేటి ఆధునిక డిజిటల్ యుగంలో సైబర్ నేరగాళ్లు సాలెగూడులా విస్తరిస్తున్నారు. సామాన్యుల కష్టార్జితాన్ని క్షణాల్లో మాయం చేసేందుకు దేశ సరిహద్దులు దాటి మరీ నెట్వర్క్లు నడుపుతున్నారు. తాజాగా, ఢిల్లీ తూర్పు జిల్లా పోలీసులు ‘ఆపరేషన్ సైబర్ హాక్’ పేరుతో చేపట్టిన భారీ సెర్చి ఆపరేషన్లో ఒక అంతర్జాతీయ సైబర్ ఫ్రాడ్ సిండికేట్ గుట్టు బయటపడింది. చైనా కేంద్రంగా నడిచే టెలిగ్రామ్ ఛానళ్లతో సంబంధం కలిగి ఉన్న ఈ ముఠాలో, ఖాతాదారులకు రక్షణగా ఉండాల్సిన ఒక ప్రైవేట్ బ్యాంక్ ఉద్యోగి కూడా కీలక పాత్ర పోషించడం తీవ్ర కలకలం రేపుతోంది.
ఈ మొత్తం ఉదంతం అమన్ బాబు మౌర్య అనే వ్యక్తి ఫిర్యాదుతో వెలుగులోకి వచ్చింది. ఫిబ్రవరి 22, 2026న తన ఖాతా నుంచి రూ. 10,000 అక్రమంగా బదిలీ అయ్యాయని బాధితుడు జాతీయ సైబర్ క్రైమ్ రిపోర్టింగ్ పోర్టల్ లో ఫిర్యాదు చేశారు. ఈ కేసును లోతుగా విశ్లేషించిన పాండవ్ నగర్ పోలీసులు, దర్యాప్తును స్పెషల్ స్టాఫ్ బృందానికి అప్పగించారు. దర్యాప్తులో భాగంగా మయూర్ విహార్లోని సిటీ యూనియన్ బ్యాంక్లో ఉన్న ఒక అనుమానిత ‘మ్యూల్’ ఖాతాను పోలీసులు గుర్తించారు. ‘కన్స్ట్రక్షన్ రాయల్ ఎంటర్ప్రైజ్’ పేరుతో ఉన్న ఈ ఖాతా ద్వారా భారీ ఎత్తున అనుమానాస్పద లావాదేవీలు జరిగినట్లు వెల్లడైంది.
బ్యాంక్ ఉద్యోగి విద్రోహం.. ‘మ్యూల్’ ఖాతాల వెనుక అసలు కథ
ఈ కేసులో అత్యంత విస్మయకరమైన విషయం ఏమిటంటే, నిందితులు మ్యూల్ ఖాతాలను తెరిచేందుకు బ్యాంకులోని ఒక ఇన్సైడర్ సాయం పొందారు. పోలీసులు అరెస్ట్ చేసిన ముగ్గురిలో మయూర్ విహార్ సిటీ యూనియన్ బ్యాంక్ రిలేషన్షిప్ మేనేజర్గా పనిచేస్తున్న 23 ఏళ్ల ఫ్రాన్షు కుమార్ ఉన్నాడు. ఇతడు కొంత మొత్తం కమీషన్ కోసం నిబంధనలకు విరుద్ధంగా ముఠా సభ్యులకు సహకరిస్తూ, నకిలీ ధృవపత్రాలతో ఖాతాలు తెరిపించినట్లు సాంకేతిక ఆధారాలతో సహా దొరికిపోయాడు. షోకిన్ అనే వ్యక్తి పేరుతో ఉన్న ఈ ఖాతా కేవలం ఒక్క మోసానికి మాత్రమే పరిమితం కాకుండా, దేశవ్యాప్తంగా జరిగిన మరో 8 సైబర్ నేరాలతో సంబంధం కలిగి ఉన్నట్లు విచారణలో తేలింది.
చైనా లింకులు.. ఆపరేషన్ సైబర్ హాక్
ఈ ముఠా సభ్యులు అత్యంత చాకచక్యంగా మోసం చేయటంలో తమ పనితీరు ప్రదర్శించారు. అదేసమయంలో సాంకేతికంగా నెట్వర్క్ నడిపారు. పట్టుబడిన నిందితుడు షారూక్ మొబైల్ ఫోన్ను ఫోరెన్సిక్ విశ్లేషణకు పంపగా, చైనా ఆపరేటర్లతో కూడిన టెలిగ్రామ్ ఛానళ్లు బయటపడ్డాయి. విదేశీ హ్యాండ్లర్లు ఈ ముఠాకు పంపిన ఏపీకే సాఫ్ట్వేర్ ద్వారా బాధితుల మొబైల్స్కు వచ్చే ఓటీపీ సందేశాలను నేరుగా తమ కంప్యూటర్లకు మళ్లించేవారు. తద్వారా ఖాతాలపై పూర్తి నియంత్రణ సాధించి, బాధితులు తేరుకునేలోపే డబ్బును విదేశీ ఖాతాలకు మళ్లించేవారు. ఈ సేవలకు ప్రతిఫలంగా నిందితులు క్రిప్టో కరెన్సీ రూపంలో కమీషన్లు తీసుకునేవారని డీసీపీ రాజీవ్ కుమార్ వెల్లడించారు.
ఇన్స్పెక్టర్ జితేంద్ర మాలిక్ నేతృత్వంలోని ఎస్ఐ అమన్, ఏఎస్ఐ మహేష్ సహా ప్రత్యేక బృందం ఆర్థిక లావాదేవీలను నిశితంగా పరిశీలించి ఈ రాకెట్ను ఛేదించింది. నిందితులు నిరుపేదలను ఆకర్షించి, వారి పేరిట ఖాతాలు తెరిపించి, ఆ ఖాతా క్రెడెన్షియల్స్ను విదేశీ హ్యాండ్లర్లకు అప్పగించేవారు. ఒక్కసారి డబ్బు ఖాతాలోకి రాగానే, దానిని పదుల సంఖ్యలో ఉన్న వివిధ బ్యాంకు ఖాతాలకు లేయరింగ్ పద్ధతిలో మళ్లించి, చివరికి క్రిప్టో కరెన్సీగా మార్చేవారు. ఈ నెట్వర్క్లో ఇంకా ఎంతమంది ఉన్నారనే కోణంలో పోలీసులు ప్రస్తుతం దర్యాప్తు కొనసాగిస్తున్నారు.
హెచ్చరిక:
ఈ కేసు ప్రజలకు ఒక హెచ్చరిక లాంటిది. బ్యాంక్ ఉద్యోగులు కానీ, గుర్తు తెలియని వ్యక్తులు కానీ ప్రలోభపెట్టి మీ ఖాతా వివరాలు అడిగినా, తెలియని సాఫ్ట్వేర్ లింకులు పంపినా అప్రమత్తంగా ఉండాలని పోలీసులు సూచిస్తున్నారు. అంతర్జాతీయ స్థాయిలో సాగుతున్న ఇలాంటి నేరాలను అరికట్టేందుకు బ్యాంకింగ్ వ్యవస్థలో మరింత భద్రత అవసరమని నిపుణులు అభిప్రాయపడుతున్నారు.
