Telangana Healthcare Overhaul: Hospitals to be Upgraded as per IPHS Standards

హైదరాబాద్, ఏప్రియల్ 18 : తెలంగాణ ప్రభుత్వ వైద్య వ్యవస్థను మరింత పటిష్టం చేసే దిశగా రాష్ట్ర ఆరోగ్య శాఖ మంత్రి దామోదర రాజనర్సింహ కీలక అడుగులు వేశారు. రాష్ట్రవ్యాప్తంగా ఉన్న కమ్యూనిటీ హెల్త్ సెంటర్లు (CHC), ఏరియా మరియు జిల్లా ఆసుపత్రులను ‘ఇండియన్ పబ్లిక్ హెల్త్ స్టాండర్డ్స్’ (IPHS) ప్రమాణాలకు అనుగుణంగా తీర్చిదిద్దాలని ఆయన ఉన్నతాధికారులను ఆదేశించారు. సచివాలయంలో జరిగిన ‘డైరెక్టరేట్ ఆఫ్ సెకండరీ హెల్త్ కేర్’ (గతంలో టీవీవీపీ) సమీక్షా సమావేశంలో మంత్రి ఈ మేరకు స్పష్టమైన కార్యాచరణను రూపొందించారు.

రాష్ట్రంలోని ప్రతి రోగికి తమ సొంత జిల్లాలోనే, ఇంటికి దగ్గరలోనే మెరుగైన వైద్య సేవలు అందాలన్నదే ప్రభుత్వ లక్ష్యమని మంత్రి స్పష్టం చేశారు. ఇందుకోసం ద్వితీయ శ్రేణి వైద్య వ్యవస్థను బలోపేతం చేయాల్సిన అవసరం ఎంతైనా ఉందని ఆయన పేర్కొన్నారు. మౌలిక సదుపాయాల కల్పన, అత్యాధునిక వైద్య పరికరాలు, నిరంతర మందుల సరఫరా మరియు మానవ వనరుల సమర్థ వినియోగంపై ప్రధానంగా దృష్టి సారించాలని అధికారులకు సూచించారు.

టీవీవీపీ పరిధిలో ఉన్న సుమారు 30 ఆసుపత్రులను ఇటీవల వైద్య కళాశాలలతో అనుసంధానించి టీచింగ్ ఆసుపత్రులుగా అప్‌గ్రేడ్ చేయడం జరిగింది. ఈ క్రమంలో ఆయా ఆసుపత్రుల్లో ఉన్న మంజూరైన పోస్టులను ఇతర కేంద్రాలకు సర్దుబాటు చేసే ప్రక్రియపై మంత్రి సమీక్షించారు. సిబ్బంది క్రమబద్ధీకరణలో ఐపీహెచ్‌ఎస్ నిబంధనలను ఖచ్చితంగా పాటించాలని, దీనివల్ల వైద్య సేవల్లో నాణ్యత పెరుగుతుందని ఆయన భరోసా ఇచ్చారు.

నియామకాలపై ప్రత్యేక దృష్టి.. క్రమశిక్షణే ప్రాధాన్యత

గత రెండేళ్ల కాలంలో వైద్య విభాగంలో 12,649 పోస్టులను భర్తీ చేశామని, వీటిని సమర్థవంతంగా వినియోగించుకోవాలని మంత్రి ఆదేశించారు. వైద్యులు, సిబ్బంది హాజరుపై కఠిన నిఘా ఉంచాలని, ప్రతివారం క్షేత్రస్థాయిలో పర్యటనలు చేయడం తప్పనిసరి అని స్పష్టం చేశారు. విధులకు గైర్హాజరయ్యే వారిపై ఉపేక్షించే ప్రసక్తే లేదని, వారిపై కఠిన చర్యలు తీసుకుంటామని హెచ్చరించారు. వైద్యులతో పాటు నర్సులు, పారామెడికల్ సిబ్బంది, రోగనిర్ధారణ పరీక్షల యంత్రాలు కలిస్తేనే వైద్య వ్యవస్థ పరిపూర్ణమవుతుందని ప్రముఖ నిపుణులు కె. శ్రీనాథ్ రెడ్డి అభిప్రాయపడ్డారు.

నిమ్స్, ఉస్మానియా, గాంధీ, ఎంజీఎం వంటి ప్రధాన టెరియరీ ఆసుపత్రులపై ఒత్తిడిని తగ్గించేందుకు మంత్రి ఒక నూతన విధానాన్ని తీసుకువచ్చారు. టెరియరీ ఆసుపత్రులలో చికిత్స పొంది డిశ్చార్జ్ అయిన రోగులు, ఫాలో-అప్ చికిత్స కోసం తమకు దగ్గరలోని ప్రాథమిక లేదా ద్వితీయ శ్రేణి ఆరోగ్య కేంద్రాలకు వెళ్లేలా చర్యలు చేపట్టాలని ఆదేశించారు. దీనివల్ల పేద రోగులకు ప్రయాణ ఖర్చులు తగ్గడంతో పాటు, స్థానిక ఆసుపత్రులపై ప్రజలకు నమ్మకం పెరుగుతుందని ఆయన పేర్కొన్నారు.

ప్రైవేట్ ఆసుపత్రులపై నిఘా

ప్రభుత్వ ఆసుపత్రుల్లో తాగునీరు, ఫ్యాన్లు, ఏసీలు మరియు అగ్నిమాపక భద్రత వంటి కనీస సౌకర్యాలను వేసవి నేపథ్యంలో యుద్ధ ప్రాతిపదికన మెరుగుపరచాలని మంత్రి ఆదేశించారు. ప్రైవేట్ స్కానింగ్ కేంద్రాల్లో అక్రమంగా జరుగుతున్న లింగ నిర్ధారణ పరీక్షలను అరికట్టాలని, ఇందుకోసం ఏర్పాటు చేసిన టాస్క్ ఫోర్స్ కమిటీ నివేదికల ఆధారంగా కఠిన చర్యలు తీసుకోవాలని అధికారులకు దిశానిర్దేశం చేశారు. ఆరోగ్య వ్యవస్థలో పారదర్శకత, బాధ్యతాయుతమైన పనితీరును నిర్ధారించేందుకు ఈ చర్యలు దోహదపడతాయని వైద్య వర్గాలు భావిస్తున్నాయి.