UIDAI ఆధార్ ఆఫ్ లైన్ వెరిఫికేషన్ వ్యవస్థలో 100 ప్రముఖ సంస్థలు చేరాయి. ఈ విధానం ద్వారా పత్రాలు లేకుండా, గోప్యతను కాపాడుకుంటూ సేవలను ఎలా పొందాలో ఈ కథనంలో తెలుసుకోండి.
న్యూఢిల్లీ, ఏప్రియల్ 20 : భారత ప్రభుత్వ ఆధ్వర్యంలోని యూనిక్ ఐడెంటిఫికేషన్ అథారిటీ ఆఫ్ ఇండియా మరో కీలక మైలురాయిని అధిగమించింది. ఆధార్ను నేరుగా సెంట్రల్ డేటాబేస్తో అనుసంధానించాల్సిన అవసరం లేకుండానే, అత్యంత సురక్షితంగా, గోప్యంగా గుర్తింపును ధృవీకరించే 'ఆధార్ ఆఫ్ లైన్ వెరిఫికేషన్' వ్యవస్థకు అనూహ్య స్పందన లభిస్తోంది. ఈ విధానం అందుబాటులోకి వచ్చిన కేవలం మూడు నెలల వ్యవధిలోనే వందకు పైగా సంస్థలు 'ఆఫ్ లైన్ వెరిఫికేషన్ సీకింగ్ ఎంటిటీస్' (OVSEs)గా చేరి, డిజిటల్ సేవలలో సరికొత్త అధ్యాయానికి తెరలేపాయి.
అన్ని రంగాలకు వర్తింపు..
ప్రభుత్వ శాఖల నుంచి మొదలుకుని ఫిన్టెక్ సంస్థలు, హాస్పిటాలిటీ, విద్యా సంస్థలు, రిక్రూట్మెంట్ ఏజెన్సీలు.. ఇలా దాదాపు అన్ని రంగాలకు చెందిన వంద సంస్థలు ఈ వెరిఫికేషన్ పద్ధతిని తమ కార్యకలాపాల్లో భాగం చేసుకున్నాయి. గతంలో డాక్యుమెంట్ల పరిశీలన అంటే భౌతిక ప్రతులు, వాటి ధృవీకరణ కోసం గంటల తరబడి వేచి చూడాల్సిన పరిస్థితి ఉండేది. ఇప్పుడు ఈ ఆఫ్ లైన్ విధానంతో ఆ ఇబ్బందులు తొలగిపోయాయి. ముఖ్యంగా క్యూఆర్ కోడ్ (QR Code) స్కానింగ్ మరియు డిజిటల్ సంతకం చేసిన పత్రాల ద్వారా నిమిషాల్లోనే కస్టమర్ల లేదా పౌరుల గుర్తింపును నిర్ధారించుకునే అవకాశం ఈ సంస్థలకు లభించింది.
గోప్యతకు భరోసా - వినియోగదారుడిదే పెత్తనం
ఈ వెరిఫికేషన్ ప్రక్రియలో అత్యంత ముఖ్యమైన అంశం వినియోగదారుడికి ఉన్న అధికారం. సమాచారాన్ని పంచుకునేటప్పుడు ఎంత మేర వివరాలు వెల్లడించాలో ఆధార్ నంబర్ హోల్డర్ నిర్ణయించుకోవచ్చు. అంటే, పూర్తి స్థాయి సమాచారాన్ని ఇవ్వకుండా, కేవలం అవసరమైన సమాచారాన్ని మాత్రమే సదరు సంస్థలకు 'షో, షేర్ అండ్ వెరిఫై' పద్ధతిలో అందించవచ్చు. దీనివల్ల వ్యక్తిగత డేటా గోప్యతకు ఎటువంటి భంగం కలగదు. రియల్ టైమ్ కనెక్టివిటీ లేకున్నా పని జరిగిపోవడం, పేపర్లెస్ లావాదేవీలు నిర్వహించడం వల్ల ఆయా సంస్థల నిర్వహణ ఖర్చు కూడా భారీగా తగ్గుతోంది.
సామాన్యుడికి 'ఈజ్ ఆఫ్ లివింగ్'
భారత డిజిటల్ పబ్లిక్ ఇన్ఫ్రాస్ట్రక్చర్లో ఇదొక కీలక పరిణామంగా నిపుణులు అభివర్ణిస్తున్నారు. ఈ వికేంద్రీకృత వెరిఫికేషన్ విధానం వల్ల సేవలు మరింత వేగవంతంగా సామాన్యుడికి అందుతున్నాయి. ఆధార్ కలిగి ఉన్న పౌరులు ఇకపై ఎలాంటి అసౌకర్యం లేకుండా, సులభంగానే సర్వీసులను పొందవచ్చు. పత్రాల సమర్పణ భారం తగ్గడమే కాకుండా, పారదర్శకమైన, సమ్మతితో కూడిన సేవల ద్వారా డిజిటల్ లావాదేవీలపై పౌరుల్లో విశ్వాసం పెరుగుతోంది. భవిష్యత్తులో మరిన్ని సంస్థలు ఈ బాటలో పయనిస్తే, దేశవ్యాప్తంగా పౌర సేవలందించే తీరు పూర్తిగా మారిపోతుందని ఈ వంద సంస్థల చేరిక నిరూపిస్తోంది.
