భారతీయ సంస్కృతిలో తిథులకు, నక్షత్రాలకు ఉన్న ప్రాముఖ్యత అంతా ఇంతా కాదు. అందులోనూ ‘అక్షయ తృతీయ’కు ఉన్న స్థానం అత్యున్నతమైనది. ‘అక్షయం’ అంటేనే క్షయం లేనిది, అంటే తరిగిపోనిది అని అర్థం. ఈ ఏడాది రాబోతున్న అక్షయ తృతీయ కేవలం ఒక పండుగ మాత్రమే కాదు, ఖగోళ శాస్త్ర రీత్యా మరియు జ్యోతిష్య శాస్త్ర రీత్యా ఒక అద్భుతమైన ‘యోగం’గా పండితులు అభివర్ణిస్తున్నారు.

అరుదైన రాజయోగాల సమాహారం

ఈ ఏడాది అక్షయ తృతీయను అత్యంత శుభప్రదంగా భావించడానికి ప్రధాన కారణం.. గ్రహాల స్థితిగతులు. జ్యోతిష్య శాస్త్రవేత్తల విశ్లేషణ ప్రకారం, ఈ రోజున శుక్రుడు తన స్వక్షేత్రమైన వృషభ రాశిలో ప్రవేశించడం వల్ల ‘మాళవ్య రాజయోగం’ ఏర్పడనుంది. దీనికి తోడు, చంద్రుడు కూడా తన ఉచ్ఛ రాశియైన వృషభంలో ఉండటం, గురు-చంద్రుల కలయికతో ‘గజకేసరి యోగం’ నిర్మితం కావడం విశేషం. సూర్యచంద్రులిద్దరూ తమ ఉచ్ఛ స్థితిలో ఉండే ఈ అరుదైన ముహూర్తంలో చేసే ఏ కార్యమైనా అనంతమైన ఫలితాలను ఇస్తుందని శాస్త్ర వచనం.

ఆధ్యాత్మిక ప్రాశస్త్యం.. అవతారాల పుణ్య దినం

పురాణాల ప్రకారం, ఈ తిథికి ఎంతో విశిష్టత ఉంది. భగవంతుని అవతారాలైన పరశురాముడు, నర నారాయణులు, హయగ్రీవుడు ఈ రోజే ధరణిపై ఉద్భవించారని నమ్ముతారు. హిమాలయాల్లోని పవిత్ర క్షేత్రం బద్రీనాథ్ ఆలయ ద్వారాలు ఈ రోజే తెరుచుకోవడం ఒక ఆధ్యాత్మిక వేడుక. అటు బృందావనంలో బాంకే బిహారీ చరణ దర్శనం ఏడాదికి ఒక్కసారి మాత్రమే ఈ రోజే లభిస్తుంది. ఇక తెలుగు రాష్ట్రాల విషయానికి వస్తే, సింహాచల వరాహ లక్ష్మీనరసింహ స్వామి వారి ‘చందనోత్సవం’ ఈ తిథి నాడే నిర్వహిస్తారు. స్వామి వారి నిజరూప దర్శనం కోసం కోట్లాది మంది భక్తులు ఎదురుచూసే అరుదైన ఘట్టం ఇది.

బంగారం కొనుగోళ్లు.. దానాల వెల్లువ

అక్షయ తృతీయ అనగానే సామాన్యుడికి గుర్తొచ్చేది బంగారం కొనుగోళ్లు. ఈ రోజున విలువైన వస్తువులు కొంటే సంపద వృద్ధి చెందుతుందనేది ఒక బలమైన నమ్మకం. అక్షయ తృతీయ సెంటిమెంట్‌ను గౌరవిస్తూ గ్రాము లేదా రెండు గ్రాముల బంగారం కొనడం వల్ల పెద్దగా నష్టం ఉండదు. కానీ, భారీ పెట్టుబడులు పెట్టాలనుకునే వారు మాత్రం పశ్చిమ ఆసియా రాజకీయ పరిస్థితులను, డాలర్ విలువను నిశితంగా గమనించాలి. "విశ్వాసం" అదృష్టాన్ని ఇస్తుందని భావించినా, "విజ్ఞత"తో చేసే పెట్టుబడి మాత్రమే ఆర్థిక భద్రతను ఇస్తుంది. యుద్ధ కాలంలో బంగారం ఒక ఆయుధం వంటిది, దానిని తెలివిగా వాడుకోవడమే ఉత్తమం!

రాశులపై ప్రభావం: ఎవరికి రాజయోగం?

ఈ అద్భుత గ్రహాల కలయిక వల్ల కొన్ని రాశుల వారికి అదృష్టం వరించబోతోంది. మేష రాశివారికి కెరీర్‌లో ఊహించని మార్పులు రానున్నాయి. ప్రమోషన్లు లేదా కొత్త ఉద్యోగ అవకాశాల కోసం చూస్తున్న వారికి ఇది గోల్డెన్ పీరియడ్. ఇక సింహ రాశి వారికి సామాజికంగా గౌరవ మర్యాదలు పెరుగుతాయి. ఆస్తి వివాదాలు పరిష్కారమై ఆర్థిక స్థితి మెరుగుపడుతుంది. అలాగే వృశ్చిక రాశి వారికి నిలిచిపోయిన నిధులు అందుతాయి. కొత్త బిజినెస్ ప్లాన్లకు ఇది సరైన సమయంగా జ్యోతిష్య పండితులు చెబుతున్నారు. ధనుస్సు రాశి వారికి వాహన లేదా గృహ యోగం కనిపిస్తోంది. ఆదాయ మార్గాలు పెరుగుతాయట . వృషభ రాశి వారు శుక్ర, చంద్రుల ప్రభావంతో వీరికి రాజభోగాలు, ఆకస్మిక ధనలాభం కలిగే అవకాశం ఉందని విశ్లేషకులు చెబుతున్నారు.

వ్యాపారస్తులకు ‘ఖాతా పూజ’

వ్యాపారస్తులు ఈ రోజును అత్యంత పవిత్రంగా భావిస్తారు. కొత్త వ్యాపారాలు ప్రారంభించడమే కాకుండా, పాత లెక్కలు ముగించి కొత్త ఖాతా పుస్తకాలు ప్రారంభించడానికి ఈ తిథి కంటే మించిన ముహూర్తం మరొకటి లేదని పండితులు పేర్కొంటున్నారు.

మొత్తంగా చూస్తే, ఈ ఏడాది అక్షయ తృతీయ అనేది కేవలం ఒక సంప్రదాయం మాత్రమే కాదు.. అది ఆధ్యాత్మిక చింతన, ఆర్థిక వృద్ధి మరియు అదృష్టాల కలబోత. భాగీరథుడు గంగమ్మను భూమికి తెచ్చిన రోజైనా, కుబేరుడు లక్ష్మీదేవి అనుగ్రహం పొందిన రోజైనా.. ప్రతి కథనం వెనుక ఉన్న పరమార్థం ఒక్కటే - సత్కర్మలు చేయడం. ఈ పవిత్ర దినాన మంచి ఆలోచనతో, పరోపకార బుద్ధితో చేసే ఏ చిన్న ప్రయత్నమైనా జీవితంలో అక్షయమైన ఫలితాలను అందిస్తుందనడంలో సందేహం లేదు.