విజయవాడ , మే 21 : ఆంధ్రప్రదేశ్ సౌర విద్యుత్ రంగంలో సరికొత్త చరిత్ర లిఖించబడింది. రాష్ట్ర ప్రభుత్వ ప్రతిష్టాత్మక ‘సమన్విత స్వచ్ఛ ఇంధన విధానం 2024’ (Integrated Clean Energy Policy 2024) కింద తొలి మెగా ప్రాజెక్టు పట్టాలెక్కింది. ప్రముఖ పునరుత్పాదక ఇంధన సంస్థ ‘ఎస్ఏఈఎల్ ఇండస్ట్రీస్ లిమిటెడ్’ (SAEL) రాయలసీమ ముఖద్వారమైన కర్నూలులో 600 మెగావాట్ల (ఏసీ) సామర్థ్యంతో ఏర్పాటు చేసిన భారీ సౌర విద్యుత్ కేంద్రాన్ని విజయవంతంగా అందుబాటులోకి తెచ్చింది. కేవలం 11 నెలల రికార్డు కాలంలో, రూ. 3,000 కోట్ల భారీ పెట్టుబడితో పూర్తయిన ఈ ప్రతిష్టాత్మక ప్రాజెక్టును మే 22న అధికారికంగా ప్రారంభించనున్నారు.
కర్నూలు వేదికగా ఎస్ఏఈఎల్ సరికొత్త రికార్డు
రాష్ట్రంలో పారిశ్రామిక వేగానికి నిదర్శనంగా నిలిచిన ఈ ప్రాజెక్టును ఎస్ఏఈఎల్ సంస్థ తన అనుబంధ విభాగాలైన ‘ఎస్ఏఈఎల్ సోలార్ ఎంహెచ్పీ1’, ‘ఎస్ఏఈఎల్ సోలార్ ఎంహెచ్పీ2’ ప్రైవేట్ లిమిటెడ్ల ద్వారా నిర్మించింది. కర్నూలు పరిధిలోని సుమారు 2,400 ఎకరాలకు పైగా విస్తీర్ణంలో రెండు విభాగాలుగా (చెరో 300 మెగావాట్లు) ఈ సోలార్ ప్లాంట్లను రూపుదిద్దారు. రాయలసీమ ప్రాంతంలో భౌగోళిక సవాళ్లు, ప్రతికూల వాతావరణ పరిస్థితులు ఎదురైనప్పటికీ, పక్కా ప్రణాళికతో పనులను అనుకున్న సమయం కంటే ముందే పూర్తి చేయడం విశేషం. ఈ విజయం తమ సంస్థ యొక్క కార్యనిర్వాహక సామర్థ్యానికి అద్దం పడుతుందని ఎస్ఏఈఎల్ సీఈఓ & ఎగ్జిక్యూటివ్ డైరెక్టర్ లక్షిత్ అవ్లా హర్షం వ్యక్తం చేశారు. ప్రాజెక్టు సకాలంలో పూర్తి కావడానికి ఆంధ్రప్రదేశ్ ప్రభుత్వం అందించిన అపారమైన సహకారానికి ఆయన ప్రత్యేక కృతజ్ఞతలు తెలిపారు.
పర్యావరణ పరిరక్షణతో పాటు దీర్ఘకాలిక ఇంధన భద్రత
ఈ ప్రాజెక్టు ద్వారా ఉత్పత్తి అయ్యే విద్యుత్తును నేరుగా జాతీయ గ్రిడ్కు అనుసంధానించనున్నారు. దీనికోసం ‘సోలార్ ఎనర్జీ కార్పొరేషన్ ఆఫ్ ఇండియా’ (SECI) తో 25 ఏళ్ల పాటు సుదీర్ఘ విద్యుత్ కొనుగోలు ఒప్పందాన్ని (PPA) సంస్థ కుదుర్చుకుంది. ఇది కంపెనీకి దీర్ఘకాలిక ఆదాయ స్థిరత్వాన్ని చేకూర్చనుంది. పర్యావరణ హితమే పరమావధిగా సాగిన ఈ ప్రాజెక్టు వల్ల ఏటా సుమారు 11 లక్షల టన్నుల కార్బన్ ఉద్గారాలు (tCO₂e) తగ్గుతాయని అంచనా. దేశీయ పరిజ్ఞానాన్ని ప్రోత్సహిస్తూ, పంజాబ్, రాజస్థాన్లలోని ఎస్ఏఈఎల్ స్వంత తయారీ కేంద్రాల్లో అసెంబుల్ చేసిన 12 లక్షలకు పైగా అత్యాధునిక ‘టాప్కాన్ బైఫేషియల్’ (TOPCon bifacial) సోలార్ మాడ్యూళ్లను ఈ ప్లాంట్లో వినియోగించడం మరో విశేషం.
ఆంధ్రప్రదేశ్కు గ్రీన్ ఎనర్జీ పెట్టుబడుల వెల్లువ
ఆంధ్రప్రదేశ్ను దేశంలోనే స్వచ్ఛ ఇంధన రాజధానిగా (Clean Energy Capital) మార్చాలనే సంకల్పంతో ఉన్న రాష్ట్ర ప్రభుత్వానికి ఈ ప్రాజెక్టు విజయం కొండంత బలాన్ని ఇచ్చింది. రాబోయే రోజుల్లో రాష్ట్రంలో ఏకంగా రూ. 10 లక్షల కోట్ల మేర హరిత ఇంధన పెట్టుబడులను ఆకర్షించడమే లక్ష్యంగా ప్రభుత్వం అడుగులు వేస్తోంది. "ఆంధ్రప్రదేశ్లో మేము కేవలం శంకుస్థాపనలకే పరిమితం కాము, రికార్డులను తిరగరాస్తాం" అంటూ మంత్రి నారా లోకేష్“ఎక్స్” లో పోస్ట్ చేసారు. ప్రభుత్వ వర్గాలు ఈ ప్రాజెక్టు వేగాన్ని కొనియాడాయి. 2030 నాటికి దేశంలో శిలాజ రహిత (Non-fossil fuel) ఇంధన లక్ష్యాలను చేరుకోవడంలో ఏపీ కీలక భాగస్వామి కానుంది.
2.5 గిగావాట్ల మైలురాయిని దాటిన ఎస్ఏఈఎల్ సామర్థ్యం
సమీకృత పునరుత్పాదక ఇంధన రంగంలో దూసుకుపోతున్న ఎస్ఏఈఎల్ ఇండస్ట్రీస్ గ్రూప్, ఈ ఏడాది జనవరిలోనే గుజరాత్లోని ఖావ్డాలో 1 GWp సోలార్ ప్రాజెక్టును ప్రారంభించింది. తాజాగా కర్నూలు ప్రాజెక్టు కూడా తోడవడంతో కంపెనీ మొత్తం కార్యాచరణ సామర్థ్యం (Operational Capacity) 2.5 గిగావాట్ల (GWp) మైలురాయిని దాటింది. ప్రస్తుతం ఈ సంస్థకు దేశవ్యాప్తంగా సోలార్ ఐపీపీ, బ్యాటరీ ఎనర్జీ స్టోరేజ్ సిస్టమ్స్ (BESS) పరిధిలో ఆపరేషనల్ మరియు పైప్లైన్ కలిపి మొత్తం 8,299 MWp భారీ పోర్ట్ఫోలియో ఉంది. దీనితో పాటు వ్యవసాయ వ్యర్థాల ఆధారిత విద్యుత్ (Agri WTE), సోలార్ మాడ్యూల్ తయారీలోనూ సంస్థ ముందంజలో ఉంది. ఉత్తరప్రదేశ్లోని గ్రేటర్ నోయిడాలో అదనంగా 5 గిగావాట్ల సోలార్ సెల్, 5 గిగావాట్ల సోలార్ మాడ్యూల్ తయారీ కేంద్రాన్ని కూడా సంస్థ ప్రతిష్టాత్మకంగా ఏర్పాటు చేస్తోంది.
Keywords:SAEL Kurnool solar project, AP Clean Energy Policy 2024, Andhra Pradesh 600 MW solar plant, Nara Lokesh tweet on SAEL, SAEL operational capacity 2.5 GWp, Renewable energy investments in AP, Rayalaseema solar energy.
