న్యూఢిల్లీ, ఏప్రిల్ 18:గ్లోబల్ పరిణామాల దృష్ట్యా సముద్ర వాణిజ్యంలో ప్రస్తుతం అనిశ్చితి నెలకొంది.దీన్ని దృష్టిలో పెట్టుకుని భారత నౌకాయాన రంగానికి కేంద్ర ప్రభుత్వం చారిత్రాత్మక రక్షణ కవచాన్ని సిద్ధం చేసింది. ప్రధాని నరేంద్ర మోదీ నేతృత్వంలోని కేంద్ర మంత్రివర్గం తాజాగా ‘భారత్ మెరిటైమ్ ఇన్సూరెన్స్ పూల్’ ఏర్పాటుకు గ్రీన్ సిగ్నల్ ఇచ్చింది. ఏకంగా రూ. 12,980 కోట్ల సార్వభౌమ హామీతో ఈ భారీ ప్రాజెక్టును తెరపైకి తీసుకురావడం ద్వారా, అంతర్జాతీయ బీమా సంస్థలపై భారత్ ఆధారపడటాన్ని తగ్గించే దిశగా కీలక అడుగు పడింది.

అంతర్జాతీయ అనిశ్చితి.. దేశీయ పరిష్కారం

ప్రస్తుత అంతర్జాతీయ భౌగోళిక రాజకీయ పరిస్థితులు సముద్ర మార్గాల్లో నిరంతరం ఉద్రిక్తతలను పెంచుతున్నాయి. దీనివల్ల నౌకలు, అందులోని సరుకులకు భద్రత ప్రమాదకరంగా మారుతోంది. గతంలో భారతీయ నౌకలు థర్డ్ పార్టీ బాధ్యతలు, చమురు కాలుష్యం, సిబ్బంది భద్రత వంటి అంశాల కోసం ప్రధానంగా అంతర్జాతీయ సంస్థ అయిన 'ఇంటర్నేషనల్ గ్రూప్ ఆఫ్ ప్రొటెక్షన్ అండ్ ఇండెంనిటీ' (IGP&I) క్లబ్‌పైనే ఆధారపడాల్సి వచ్చేది. అయితే, ఆంక్షలు లేదా ఉద్రిక్తతల వల్ల అకస్మాత్తుగా ఈ సంస్థలు కవరేజీని నిలిపివేస్తే, భారత వాణిజ్యం స్తంభించే ముప్పు ఉండేది. ఈ సంక్షోభ పరిస్థితులను అధిగమించేందుకు, దేశీయంగా ఒక సమర్థవంతమైన వ్యవస్థ ఉండాలన్న లక్ష్యంతో ప్రభుత్వం ఈ BMI పూల్‌కు రూపకల్పన చేసింది.

సరిహద్దులు దాటి.. నమ్మకమైన కవరేజ్

ఈ కొత్త విధానం ప్రకారం, భారతీయ జెండా కలిగిన ఓడలు, భారతీయ నియంత్రణలో ఉన్న నౌకలకు ఇకపై స్థానిక స్థాయిలోనే పూర్తిస్థాయి బీమా లభించనుంది. అంతేకాదు, అస్థిరమైన సముద్ర మార్గాల ద్వారా ఇతర దేశాల నుంచి భారత్‌కు, భారత్ నుంచి ఇతర దేశాలకు వచ్చే సరుకు రవాణా చేసే నౌకలన్నింటికీ ఈ పూల్ రక్షణ కల్పిస్తుంది. హల్ అండ్ మెషినరీ , కార్గో, పీ అండ్ ఐ మరియు యుద్ధ పరిస్థితుల వల్ల కలిగే నష్టాలను కూడా ఈ పూల్ పరిధిలోకి తీసుకువచ్చారు. దాదాపు రూ. 950 కోట్ల ఉమ్మడి అండర్ రైటింగ్ సామర్థ్యంతో ఈ పూల్ కార్యకలాపాలు సాగుతాయని ప్రభుత్వం పేర్కొంది.

స్వయం సమృద్ధి దిశగా..

ఈ పూల్ ఏర్పాటు వల్ల భారత్ కేవలం ఆర్థిక ప్రయోజనాలే కాకుండా, సాంకేతిక నైపుణ్యాన్ని కూడా అందుకోనుంది. స్వదేశీ బీమా సంస్థలు ఈ పూల్‌లో సభ్యులుగా చేరి, భారతీయ నౌకాయాన పరిస్థితులకు అనుగుణంగా ప్రత్యేకమైన అండర్ రైటింగ్, క్లెయిమ్‌ల పరిష్కారం మరియు చట్టపరమైన సలహాల వంటి విభాగాల్లో నిపుణులను తయారుచేస్తాయి. ఈ మొత్తం వ్యవస్థ పర్యవేక్షణ కోసం ఒక ప్రత్యేక గవర్నింగ్ బాడీని సైతం ఏర్పాటు చేయనున్నారు. 'ఆత్మనిర్భర భారత్'లో భాగంగా సముద్ర వాణిజ్య రంగంలో స్వయం సమృద్ధిని సాధించడం, అంతర్జాతీయ ఆంక్షలను ధీటుగా ఎదుర్కోవడం మరియు సార్వభౌమ నియంత్రణను పటిష్టం చేయడమే ఈ నిర్ణయం వెనుక ఉన్న అసలైన వ్యూహమని నిపుణులు విశ్లేషిస్తున్నారు.

పి ఐ బి