న్యూఢిల్లీ: దేశీ యువతకు కార్పొరేట్ ప్రపంచంలో మేటి అవకాశాలను కల్పించే లక్ష్యంతో కేంద్ర ప్రభుత్వం ప్రతిష్టాత్మకంగా చేపట్టిన 'ప్రధానమంత్రి ఇంటర్న్‌షిప్ పథకం'లో తాజాగా కీలక మార్పులు చోటుచేసుకున్నాయి. ఇప్పటివరకు కేవలం చదువు పూర్తయిన వారికే పరిమితమైన ఈ అవకాశాన్ని, ఇకపై డిగ్రీ, పీజీ ఆఖరి ఏడాది చదువుతున్న విద్యార్థులకు కూడా వర్తింపజేస్తూ కేంద్ర కార్పొరేట్ వ్యవహారాల మంత్రిత్వ శాఖ సంచలన నిర్ణయం తీసుకుంది. విద్యాభ్యాసం కొనసాగిస్తూనే పరిశ్రమల పనితీరుపై పట్టు సాధించేలా, విద్యార్థులను భావి భారత నిపుణులుగా తీర్చిదిద్దే క్రమంలో ఈ నిర్ణయం తీసుకున్నట్లు ప్రభుత్వం ప్రకటించింది. విద్యాశాఖలోని ఉన్నత విద్యా విభాగంతో సంప్రదింపులు జరిపిన అనంతరం, పైలట్ దశలో ఉన్న ఈ పథకానికి నూతన మార్గదర్శకాలను విడుదల చేశారు.

విద్యార్థి దశలోనే వృత్తి నైపుణ్యాల శిక్షణ

జాతీయ విద్యా విధానం ఆశయాలకు అనుగుణంగా, విద్యార్థులు తరగతి గదులకే పరిమితం కాకుండా క్షేత్రస్థాయిలో అనుభవం గడించాలన్నదే ఈ నిర్ణయం వెనుక ఉన్న ప్రధాన ఉద్దేశ్యం. విద్యాభ్యాసం పూర్తయ్యాక ఉద్యోగ వేటలో పడకుండా, చదువుకుంటూనే పరిశ్రమల పనితీరును అర్థం చేసుకునేందుకు ఇది ఒక చక్కని వారధిలా పనిచేస్తుంది. దీనివల్ల విద్యార్థుల్లో సమస్య పరిష్కార నైపుణ్యం, కమ్యూనికేషన్ స్కిల్స్, టీమ్ వర్క్ వంటి వృత్తిపరమైన మెళకువలు పెంపొందుతాయి. తద్వారా వారు డిగ్రీ పట్టాతో బయటకు వచ్చే సమయానికి పూర్తిస్థాయిలో 'జాబ్ రెడీ'గా ఉంటారని నిపుణులు భావిస్తున్నారు. అకాడమిక్ జ్ఞానానికి, పరిశ్రమల అవసరాలకు మధ్య ఉన్న అంతరాన్ని తగ్గించడంలో ఈ పథకం కీలక పాత్ర పోషించనుంది.

అనుమతి పత్రం తప్పనిసరి

ఈ పథకానికి దరఖాస్తు చేసుకునే 18 నుండి 25 ఏళ్ల లోపు విద్యార్థులు తమ విద్యా సంస్థల నుండి తప్పనిసరిగా 'నో అబ్జెక్షన్ సర్టిఫికేట్' సమర్పించాల్సి ఉంటుంది. సంబంధిత కళాశాల ప్రిన్సిపాల్, డీన్, హెచ్‌ఓడీ లేదా ట్రైనింగ్ అండ్ ప్లేస్‌మెంట్ ఆఫీసర్ ఈ ధ్రువీకరణ పత్రాన్ని జారీ చేయాలి. సదరు ఇంటర్న్‌షిప్ వల్ల విద్యార్థుల అకాడమిక్ షెడ్యూల్‌కు లేదా పరీక్షలకు ఎలాంటి ఆటంకం కలగదని విద్యాసంస్థలు ధ్రువీకరించాల్సి ఉంటుంది. దీనివల్ల విద్యార్థులు అటు చదువును, ఇటు వృత్తిపరమైన శిక్షణను సమన్వయం చేసుకునే అవకాశం కలుగుతుంది. ఇప్పటికే అమల్లో ఉన్న ఇతర అర్హత నిబంధనలు యధాతథంగా కొనసాగుతాయని మంత్రిత్వ శాఖ స్పష్టం చేసింది.

ఆర్ధిక భరోసాతో మేటి కంపెనీల్లో శిక్షణ

ఈ పథకం కింద ఎంపికైన ప్రతి ఇంటర్న్‌కు నెలకు కనీసం రూ.9,000 ఆర్థిక సహాయం అందుతుంది. ప్రస్తుతం పైలట్ ప్రాజెక్ట్ మూడవ దశలో ఉన్న ఈ పథకంలో దేశవ్యాప్తంగా సుమారు 300కు పైగా దిగ్గజ సంస్థలు భాగస్వామ్యమయ్యాయి. వివిధ రంగాల్లో అందుబాటులో ఉన్న వేలాది ఇంటర్న్‌షిప్ అవకాశాలను విద్యార్థులు తమ ఆసక్తిని బట్టి ఎంచుకోవచ్చు. ఆసక్తి గల అభ్యర్థులు అధికారిక పోర్టల్ www.pminternship.mca.gov.in ద్వారా తమ వివరాలను నమోదు చేసుకుని, నచ్చిన కంపెనీల్లో దరఖాస్తు చేసుకోవచ్చని అధికారులు వెల్లడించారు. కార్పొరేట్ సంస్కృతిని, పని విధానాన్ని ప్రత్యక్షంగా చూసే ఈ అవకాశం యువత కెరీర్‌కు గట్టి పునాది వేయనుంది.