(హైదరాబాద్ - కోడికూత డెస్క్)

మంచి అధికారులు పదవి విరమణ చేస్తే వారిని భుజాలపై ఊరేగించిన దృశ్యాలు చూసాము . ప్రభుత్వ ఉద్యోగం చేసి పదవి విరమణ చేసిన తల్లిదండ్రులకు ఆరిక ప్రయోజనాలు ఎంత వస్తాయో , వాటిని ఏమి చేయాలో అని లెక్కలు వేసుకునే ఈ రోజుల్లో ఒక కొడుకు తన తల్లి పదవీవిరమణ సందర్భాన్ని చాలా ఆసక్తికరంగా మలిచాడు. ఇంతకీ అతను ఏమి చేసాడో తెలుసా ఆమె కు ఒక కారు బహుమతిగా ఇచ్చాడు. అయితే ఏంటి అందులో ఏముంది అనుకోకండి... ఇక్కడ కారు మొత్తం కరెన్సీ నోట్లతో మెరిసిపోవడమే ఈ కథనంలోని అసలు ట్విస్ట్. ఈ ఘటన హర్యానాలో జరిగింది.

సాధారణంగా ఉద్యోగ విరమణ అంటే ఆత్మీయ వీడ్కోలు, జ్ఞాపకాల నెమరువేత. కానీ హర్యానాలో జరిగిన ఒక రిటైర్మెంట్ వేడుక మాత్రంఇపుడు దేశవ్యాప్తంగా చర్చనీయాంశంగా మారింది. మూడు దశాబ్దాలకు పైగా నిరుపేదలకు సేవ చేసిన ఒక నర్సింగ్ ఆఫీసర్‌కు ఆమె కుమారుడు ఇచ్చిన వీడ్కోలు బహుమతిని చూసి నెటిజన్లు ఫిదా అవుతున్నారు.

39 ఏళ్ల సేవా ప్రస్థానం: నర్సింగ్‌ ఆఫీసర్‌గా షాన్‌ దేవి విరమణ

హర్యానా రాష్ట్రం జులనాకు చెందిన షాన్ దేవి నర్సింగ్ ఆఫీసర్‌గా సుదీర్ఘకాలం పాటు సేవలందించారు. దాదాపు 39 ఏళ్ల పాటు రోగుల సంరక్షణలో, ఆసుపత్రి విధుల్లో నిమగ్నమైన ఆమె తాజాగా పదవీ విరమణ పొందారు. ఆమె సుదీర్ఘ సేవలకు గుర్తింపుగా, ఆ రోజును చిరస్మరణీయం చేయాలని ఆమె కుమారుడు ఒక వినూత్నమైన ఆలోచన చేశారు. తన తల్లి పడ్డ కష్టానికి ప్రతిఫలంగా, ఆమెకు ఒక ఖరీదైన కారును బహుమతిగా ఇవ్వాలని నిర్ణయించుకున్నారు.

పూల అలంకరణకు బదులు నోట్ల దండలు: సోషల్ మీడియాలో వైరల్ వీడియో

అయితే ఆ కారును అందజేసిన విధానమే అందరినీ ఆశ్చర్యానికి గురిచేసింది. సాధారణంగా శుభకార్యాల్లో వాహనాలను పూలతో అలంకరిస్తారు. కానీ, షాన్ దేవి కుమారుడు మాత్రం తన తల్లికి ఇచ్చే కారును వేల సంఖ్యలో పది రూపాయల నోట్లతో పూర్తిగా కప్పి వేశారు. కారు బాడీ కనిపించకుండా పది రూపాయల నోట్లను వరుసగా అతికించి, కారు ముందు భాగంలో తల్లి ఫోటోను కూడా ఏర్పాటు చేశారు. ఈ వినూత్న అలంకరణతో కూడిన కారు రోడ్డుపై వెళ్తుంటే స్థానికులందరూ ఆశ్చర్యంతో చూస్తూ ఉండిపోయారు. దీనికి సంబంధించిన వీడియో ప్రస్తుతం సోషల్ మీడియాలో వైరల్ కావడంతో నెటిజన్లు "తల్లిపై కొడుకు చూపిస్తున్న ప్రేమ అద్భుతం" అంటూ కామెంట్లు పెడుతున్నారు.

భావోద్వేగానికి గురైన తల్లి: నెటిజన్ల ప్రశంసలు

ఉద్యోగ విరమణ రోజే కొడుకు నుండి ఊహించని రీతిలో ఇంతటి అద్భుతమైన సర్ప్రైజ్ అందడంతో షాన్ దేవి భావోద్వేగానికి లోనయ్యారు. తన కుమారుడు తన పట్ల చూపిన అపారమైన అనురాగానికి ఆమె కళ్లల్లో ఆనంద బాష్పాలు రాలాయి. ఒక పక్క 39 ఏళ్ల వృత్తి జీవితానికి ముగింపు పలుకుతున్న బాధ ఉన్నప్పటికీ, కొడుకు ఇచ్చిన ఈ గౌరవం ఆమెకు ఎనలేని తృప్తిని ఇచ్చింది. కేవలం డబ్బు ప్రదర్శన కోసం కాకుండా, తన తల్లి కష్టాన్ని గుర్తించి ఆమెను ఒక మహారాణిలా సాగనంపాలనుకున్న ఆ యువకుడి ఆలోచనను నెటిజన్లు ప్రశంసిస్తున్నారు.