హైదరాబాద్, ఏప్రియల్ 18 : దేశీయ ఐటీ దిగ్గజం టాటా కన్సల్టెన్సీ సర్వీసెస్ నాసిక్ యూనిట్ కేంద్రంగా వెలుగుచూసిన ఆరోపణలు ఇప్పుడు దేశవ్యాప్తంగా కార్పొరేట్ వర్గాల్లో ప్రకంపనలు సృష్టిస్తున్నాయి. ఒక ప్రతిష్టాత్మక సంస్థ కార్యాలయంలో మతమార్పిడి ఒత్తిళ్లు, లైంగిక వేధింపులు చోటుచేసుకున్నాయన్న ఫిర్యాదులు సామాజిక, రాజకీయ కోణాల్లో తీవ్ర చర్చకు దారితీశాయి. ఒకవైపు కంపెనీ యాజమాన్యం అంతర్గత విచారణను వేగవంతం చేస్తుండగా, మరోవైపు మహారాష్ట్ర పోలీసులు ప్రత్యేక దర్యాప్తు బృందం ద్వారా ఈ వ్యవహారంలోని లోతుపాతులను వెలికితీసే ప్రయత్నం చేస్తున్నారు.
నాసిక్ యూనిట్పై వస్తున్న తీవ్ర ఆరోపణల నేపథ్యంలో టీసీఎస్ యాజమాన్యం అప్రమత్తమైంది. స్వతంత్ర విచారణ కోసం అంతర్జాతీయ ఆడిటింగ్ సంస్థ ‘డెలాయిట్’ , ప్రముఖ న్యాయ సంస్థ ‘ట్రైలీగల్’ నిపుణుల బృందాలను రంగంలోకి దించింది. ఈ మొత్తం ప్రక్రియను టీసీఎస్ సీఓఓ ఆర్థి సుబ్రమణ్యం పర్యవేక్షిస్తున్నారు. అంతేకాకుండా, కంపెనీ స్వతంత్ర డైరెక్టర్ కేకీ మిస్త్రీ నేతృత్వంలో ఒక పర్యవేక్షణ కమిటీని ఏర్పాటు చేశారు. విచారణ ఫలితాలను ఈ కమిటీకి సమర్పించి, తదుపరి కఠిన చర్యలకు సిద్ధమవుతున్నారు.
ఈ సందర్భంగా టీసీఎస్ సీఈఓ, ఎండీ కె.కృతివాసన్ స్పందిస్తూ, తమ కంపెనీ జీరో-టాలరెన్స్ విధానానికి కట్టుబడి ఉందని స్పష్టం చేశారు. ప్రాథమిక సమీక్షలో పీఓఎస్హెచ్ (లైంగిక వేధింపుల నివారణ) ఛానెళ్ల ద్వారా ఎటువంటి ఫిర్యాదులు అందలేదని ఆయన పేర్కొన్నారు. మీడియాలో వస్తున్న వార్తల నేపథ్యంలో, నిదా ఖాన్ అనే వ్యక్తికి కంపెనీలో ఎటువంటి నాయకత్వ బాధ్యతలు లేవని, ఆమె కేవలం ఒక ప్రాసెస్ అసోసియేట్ మాత్రమేనని ఆయన స్పష్టం చేశారు. నాసిక్ యూనిట్ కార్యకలాపాలు యథావిధిగా కొనసాగుతున్నాయని, యూనిట్ మూసివేతపై వస్తున్న వార్తలు అవాస్తవమని ఆయన కొట్టిపారేశారు.
'కార్పొరేట్ జిహాద్' - ఫడ్నవీస్ నిప్పులు
ఈ ఉదంతాన్ని మహారాష్ట్ర ప్రభుత్వం అత్యంత తీవ్రమైన అంశంగా పరిగణిస్తోంది. స్వయంగా ముఖ్యమంత్రి దేవేంద్ర ఫడ్నవీస్ స్పందిస్తూ, దీనిని కేవలం క్రమశిక్షణారాహిత్యంగా చూడలేమని, దీని వెనుక ‘కార్పొరేట్ జిహాద్’ కోణం ఉండవచ్చనే అనుమానాలను వ్యక్తం చేశారు. బాధితుల బలహీనతలను, ముఖ్యంగా కుటుంబ సమస్యలను ఆసరాగా చేసుకుని మతమార్పిడికి ప్రేరేపించే ప్రయత్నాలు జరిగాయన్న ఆరోపణలు విస్మయానికి గురిచేస్తున్నాయి. నిందితుల మొబైల్ ఫోన్లలో లభ్యమైన డేటా, కాల్ రికార్డులు మరియు చాట్లు వ్యవస్థీకృత కుట్ర వైపు వేలెత్తి చూపుతున్నాయి. ప్రస్తుతం తొమ్మిది ఎఫ్ఐఆర్లు నమోదయ్యాయంటే ఈ కేసు ఎంతటి తీవ్రతను సంతరించుకుందో అర్థం చేసుకోవచ్చు.
హెచ్ఆర్ విభాగం పాత్రపై నీలినీడలు
ఈ మొత్తం వ్యవహారంలో హెచ్ఆర్ విభాగం పాత్ర అనుమానాస్పదంగా మారుతోంది. బాధితులు లైంగిక వేధింపుల గురించి ఫిర్యాదు చేసినా, హెచ్ఆర్ హెడ్ అశ్విని చైని వంటి వారు వాటిని పట్టించుకోలేదన్న ఆరోపణలు కార్పొరేట్ పాలనపై అనేక ప్రశ్నలను లేవనెత్తుతున్నాయి. కంపెనీలో బాధితులకు రక్షణ కల్పించాల్సిన విభాగమే మౌనం వహించడం వల్లనే ఈ సమస్య ఇంతటి స్థాయికి చేరుకుందనే వాదనలు వినిపిస్తున్నాయి.
విస్తరిస్తున్న దర్యాప్తు.. అమరావతిలోనూ కలకలం
కేవలం నాసిక్కే పరిమితం కాకుండా, ఈ వివాదం ముంబై సహా ఇతర ప్రాంతాలకు కూడా పాకుతున్నట్లు పోలీసులు గుర్తించారు. మరోవైపు, అమరావతిలో వెలుగుచూసిన మరో లైంగిక వేధింపుల ఉదంతం, ఇటువంటి ముఠాలు సోషల్ మీడియాను ఎలా దుర్వినియోగం చేస్తున్నాయో వెల్లడిస్తోంది. అశ్లీల చిత్రాలను, వీడియోలను సర్క్యులేట్ చేస్తున్న 41 ఖాతాలను మూసివేయడం, నిందితులతో సంబంధాలున్న అధికారులపై సస్పెన్షన్ వేటు పడటం వంటి చర్యలు చూస్తుంటే, వ్యవస్థలో సమూల మార్పులు అవసరమని స్పష్టమవుతోంది.
ప్రస్తుతం నేషనల్ కమిషన్ ఫర్ ఉమెన్ కూడా ఈ కేసును నిశితంగా గమనిస్తోంది. దర్యాప్తు ఏ దశకు చేరుకుంటుంది, నిజమైన దోషులు ఎవరనేది రాబోయే రోజుల్లో తేలాల్సి ఉంది. ఏది ఏమైనా, కార్పొరేట్ కార్యాలయాల్లో సాగుతున్న ఈ అసాంఘిక కార్యకలాపాలు సమాజంలోని యువతను తప్పుదోవ పట్టించేలా ఉండటం అందరినీ కలవరపెడుతోంది.
టి సి ఎస్ దీనికి సంభందించి తన అధికారిక x ఖాతాలో పోస్ట్ చేసిన ప్రకటన లింక్ ...
https://www.bseindia.com/xml-data/corpfiling/AttachLive/784fc707-d1fa-4bf8-942b-aece132b4e8c.pdf
